Abayobozi babiri bategereje igihano kubera imyitwarire idahwitse

Muhanga: Inzego zatangiye gukora iperereza kuri Gitifu na SEDO bashinjwa gukubita no gukomeretsa umuturage.

Inzego zitandukanye z’Ubuyobozi bw’Akarere ka Muhanga zatangiye gukora iperereza ryimbitse kuri Gitifu na SEDO b’Akagari ka Mbiriri, mu Murenge wa Nyarusange.

Gitifu w’Umurenge wa Nyarusange Byicaza Claude yabwiye UMUSEKE ko Umunyamabanga Nshingwabikorwa w’Akagari ka Mbiriri witwa Murwanashyaka Jean Pierre na SEDO we witwa Nsanzimana Jean Damascène biriwe mu Mudugudu banywa inzoga, baza guhohotera uwitwa Maniraguha Eric bamuziza ko yacuruje akabari mu masaha akuze bamuca amande ya Frw 50,000.

Byicaza avuga ko Maniraguha Eric yabasabye ko bamuha gitansi (Quitance) y’amafaranga y’amande abahaye, banga kuyimuha ahubwo bikavugwa ko bamukubise bimuviramo gukomereka.

Gitifu Byicaza avuga ko Maniraguha Eric yahise ajya kwa Muganga kwivuza, agarutse asaba kurenganurwa, Inzego z’Ibanze zisaba Gitifu w’Akagari na SEDO gusubiza Maniraguha Eric amafaranga ye (Frw 50,000) bari bamwatse babeshya ko ari amande, bongeraho n’ibihumbi 100Frw y’ikiguzi cyo kwivuza.

Gitifu Byicaza avuga ko aho Ubuyobozi bw’Akarere bumenyeye ayo makuru bwafashe icyemezo cyo kubahagarika by’agateganyo kugira ngo bubakoreho iperereza ryimbitse ku byaha bubakekaho.

Yongeyeho ati: “Kubera iyo myitwarire mibi, Akarere kabaye kabahagaritse by’agateganyo kugira ngo bakorweho iperereza ku cyaha cyo gukubita no gukomeretsa umuturage.”

Byicaza avuga ko iki cyaha nikibahama bazafatirwa ibihano by’akazi bijyanye n’amategeko.

Gitifu w’Umurenge wa Nyarusange Byicaza Claude akomeza avuga ko Murwanashyaka Jean Pierre na SEDO Nzanzimana mbere y’uko bahohotera uyu muturage bakamwaka Frw 50,000 bari basinze kubera ko biriwe banywa inzoga muri uyu Mudugudu, nk’uko amakuru bamenye abivuga.

Ubu hategerejwe icyemezo Ubuyobozi bw’Akarere ka Muhanga buzafatira Gitifu w’Akagari Murwanashyaka Jean Pierre na SEDO Nzanzimana Jean Damascène.

Andi makuru avugwa kuri iki kibazo

Mu yandi makuru UMUSEKE wamenye ni uko SEDO na Gitifu w’akagari bari banyoye bataha bwije, bageze mu isantire basanga hari akabari karimo gukora, babwira nyira ako kabari ngo abahe Frw 50,000 bayita amande.

Abatse inyemezabwishyu barayimwima, bahita bamushorera ngo bage kumufungira mu kagari. Bageze mu nzira yemeye kubaha amafaranga, ariko ntibamuhe icyemeza ko yayabahaye.

Ubusanzwe bariya bayobozi si bo baca umuturage amande, ahubwo ngo Sosiyete ya Ngari ni yo ica ayo mafaranga ikanamuha inyemezabwishyu (recue).

Igihe uwo mugabo ngo yari yemeye kuyabaha, bahamagara umuntu ngo ayabazanire, mu gihe bari bamutegereje wa mugabo yahise yiruka muri iryo joro agwa ku gishyitsi akomereka isura. Uwari amuzaniye amafaranga ahageze aramubura, ba bayobozi bahita bayamwambura bariruka.

Undi avuza induru abaturage baraza, bashaka wa mugabo bamusanga aho mu gishyitsi, bahita bamujyana kumuvuza.

Mu gitondo bagiye ku murenge kurega, Umunyabanga Nshingwabikorwa w’umurenge, ngo araza afata SEDO bamujyana mu baturage kumwunga na bo, ariko Gitifu w’akagari ahita aburirwa irengero.

Bageze mu baturage barabaganiriza, Gitifu w’Umurenge ngo abategeka kwiyunga uwo muturage bamuha Frw 100,000 y’ubwiyunge.

Kuva ubwo akagari ntikongeye gufungurwa, iyo abaturage bajyagayo bababwiraga ngo abayobozi bari mu nzibacyuho.

Ibyo bimaze kumenyekana, amakuru avuga ko abayobozi bo hejuru bahise babandikira amabaruwa SEDO na Gitifu w’Akagari abirukana, gusa Gitifu w’Umurenge avuga ko ukubahagarika by’agateganyo (Suspension), kugira ngo hakorwe iperereza kuri iyo myitwarire.

MUHIZI ELISÉE
UMUSEKE.RW/Muhanga