Fungai Muderere KUMDLALO olandelayo iqembu leHighlanders lizabe lingela badlali bayo ababili abathenjiweyo uKudakwashe Mahachi lo Mongameli Tshuma, ngenxa yama yello cards, lisiya enkundleni yeGibbo Stadium ukuyadibana leTriangle United kumdlalo weCastle…
Fungai Muderere
KUMDLALO olandelayo iqembu leHighlanders lizabe lingela badlali bayo ababili abathenjiweyo uKudakwashe Mahachi lo Mongameli Tshuma, ngenxa yama yello cards, lisiya enkundleni yeGibbo Stadium ukuyadibana leTriangle United kumdlalo weCastle Lager Premier Soccer League ngoMgqibelo.
Abadlali laba ababili baphakathi kwabadlali abalitshumi abamiswe ukudlala kulimpelaviki yomdlalo wesi-28 weligi.
Ukungabi khona kukaMahachi loTshuma kuzadala uhlupho olukhulu kuBosso, ezadlala umdlalo onzima emkhankasweni wokuthola imiklomelo emithathu, ingelabo abadlali abalamandla okuvula igedi njengoMongameli.
UMahachi, ongomunye wabadlali abaledlabuzane eqenjini leHighlanders, ulobuciko bokuhlasela, ikanti uTshuma laye ubengomunye wabadlali abaqakathekileyo ekuhlaseleni kweBosso.
Ukumiswa kwabo kutsho ukuthi umqeqetshi uBenjani Mwaruwari, kumele atshintshe indlela asebenzisa ngayo abadlali bakhe abahlaselayo.
Umdlalo lo ufika ngesikhathi esiqakathekileyo sesizini, lapho umklomelo ngamunye uqakathekile njengoba amaqembu eselwela ukuqeda esendaweni engcono.
Kodwa, lanxa kunjalo, iHighlanders izathola isibindi ngokwazi ukuthi ileqembu elilabadlali abanengi abalakho ukumela labo abangekho.
Abadlali abafana lo-Andrew Mbeba, Rainsome Pavari lo-Aron “Arusha” Ngwenya bakhangelelwe ukuthi baphakame.
ITriangle yona izabe ifuna ukusebenzisa ithuba lokudlalela ekhaya eGibbo Stadium.
Uluhlu lwabadlali abamisiweyo luphinde lube lo-Abel Gwatidzo oweDynamos, Charles Teguru oweManica
Diamonds, Aaron Mackie Dzanai oweTriangle United, uMthokozisi Msebe oweScottland, uTadiwanashe Huni loVusumuzi Ngwenya abeFC Hunters, Munashe Bamala oweHardrock loJohannes Mabwe oweTelOne.
Follow the story
