Noa okwa hala okushuna koilonga… ta ti oshipangelo oshi na omhumbwe yeendokotola

ONANDJOKWE- Omundokotola weedula 31 koshipangelo shaNandjokwe, Dennis Noa ou ta tamanekelwa ekwatonghonga lomulumenhu mukwao, okwa holola kutya okwa pumbwa okushuna koilonga shaashi koshipangelo oku na omhumbwe yeendokotola.

“Omayakulo ange okwa pumbiwa koshiwana. Kandi na ondjo moshibofa eshi shaashi omulumenhu ou okwa li tu li naye mewi limwe tu li mohole,” ta ti.

Edi Noa okwe di popya oshivike sha dja ko, pefimbo a holoka momhangu yaNdangwa eshi ta yandje oumbangi wehokololo laye omanga ta pula a pewe omhito yokulifutila mo modolongo.

Oshibofa shaye osha undulilwa komafiku 9 Oktoba nelalakano lokuninga natango eindilo lokulifutila mo modolongo.

Natango, efiku olo tuu olo, ota ku ka kala oihokolola komhangu eshi Noa nomulumenhu ou vati a kwatwa keenghono tava ka popya momhangu aveshe.

Noa okwa kwatwa po neudo mu Juli eshi vati a kwata omulumenhu mukwao onghonga ou e li omushingi wotaxi.

Oshiningwanima osha ningwa konduda yaNoa moshipangelo shaNandjokwe efimbo loufiku lwopondi 01h00.

Pefimbo e li momhangu, Noa okwa hokolola ta ti okwa shakena nomulumenhu ou mu Mei neudo.

“Okudja opo otwa kala tu na ekwatafano liwa ndele hatu tameke okukala ookaume. Nokonima yefimbo otwa ya naye mekwatafano lopaihole shaashi atushe okwa li twe li panda,” ta ti.

Okwa yelifa ta ti omulumenhu ou konduda yaye okwa nangala ko oikando ine.

“Ame ina ndi mu kwata onghonga ashike okwa kala a hala oimaliwa yange shaashi tete okwa pula nge opo ndi mu landele otaxi yaye mwene,” ta ti.

Okwa weda po ta ti omulumenhu okwe mu pula N$70 000 yokulanda otaxi nokonima okwe mu pula N$35 000. “Okwa kala eya keumbo lange lwoikando ya yooloka ta teleke ta li oikulya iwa fyee hatu nu omaludu etu, tu li mewi limwe,” ta ti.

Noa okwa hokolola ta ti okwa lombwela omulumenhu kutya otava ka futwa oshimaliwa sho N$10 000 sheevili da pitilila eshi va longa moshipangelo.

“Efiku limwe okwe uya konduda yange ndele ta pula ngeenge oshimaliwa shange osha futwa. Onde mu lombwela kutya osha futwa, nokudja opo okwa pula nge natango ndi mu pe oN$1 200,” ta ti.

Noa okwa ti eshi a anyena omulumenhu ou oshimaliwa okwe mu ningila omatilifo kutya oteke mu patulila oshibofa shekwatonghonga.

Noa okwa pula omhangu opo a pewa oboolofa yoN$50 000 molwaashi oyo ashike ta dulu okufuta.

Sheli kwatelela kopolota yopolifi eshi nakuninga oshihakanwa a yandja ouyelele, okwa hokolola ta ti Noa oye e mu ufana konduda yaye ndele tava tokelwa tava nu omalodu.

Nakuninga oshihakanwa okwa popya ta ti Nao ota popi oipupulu.

Okwa hokolola ta ti Noa okwa tula opela mokakopi kaye ndele ta tameke ta kofa nokonima vati okwa kwatwa onghonga.

Eshi a pulwa komupanguli Noa, okwa ti oipupulu ina tula opela moshikunwa shomulumenhu ou.

–fhamalwa@nepc.com.na

The post Noa okwa hala okushuna koilonga… ta ti oshipangelo oshi na omhumbwe yeendokotola appeared first on New Era.