Tutalenib science laboratoriumra ge N$500 000 ǀkha ge dī-unuhe

!GOMENǁGAMS – Tutaleni ǀGapi Skoli ǁkhā-ǁkhāsenaon ge nēsi ǂgaoǀkhāsa !harib ai hâ !khaib !nâ ǁîn ôa!nâde nî dī. Nēs ge Langer Heinrich Uranium mains ge ǀgam laboratoriumra N$500 000 ai a dī-unusa xu ra !hui.

Nē dītoasa laboratoriumras ge mainsa ǀgū-ae skola ge ǀkhae, nēsin AS ǁkhā-ǁkhāsenaona ǁ-în di !âidi aiǂhomisendi ǀkha ra tsoatsoa ǁaeb ais ge nēsa kai huib ase nî ī. Skoldanab, Vicente Gideoni ge ge mî, nē !gâi!gâs ge ǂhanu ǁaeb ai a hāsam nē kurib di AS ǁkhāǁkhāsenaon !gâi!gâxase a ǂguro hîa hoan ǀkha a ǂhomitoasa laboratoriumra !nâ ǁ-în di kuribǀunis !gâide nî dīse i amaga.

Gideoni ge ǁgau!nâ-aona gere ǂgaoǂgao!nâ nē îxa ǀasa mâsib !naka ǁîn di hoaraga-e ǁkhāǁkhāsenaona māsa tsîb ge ǁkhāǁkhāsenaona gere ǂgan, nē laboratoriumra ǁîra !khōǂgā hâ xūn hoan ǀkha !amkuse nî !ûi!gâse isa.

Langer Heinrich Uraniums Dana Sîsenǂuira Direkteri, Armand Visagieb ge ge mî, skola nē mâsib !nâ huiǂuis, ǁîn di !ereams ǂnûiǂgās asen ǀhûhâsib ai ūhâ !ereamxasib di !âse īsa.

“Sida ǀhûhâsib kha ǀomkhâis, sadu ǀkha ǀomkhâis, sado !khō!oms, tare ǂhâsina du ūhâsa ǁnâu!ā tsî ǁnāsa xu ī-khā ǀkharaǀkharasiga ǂgâxa-ūs ge kaise, kaise sida !aroma a ǂhâǂhâsa,” tib ge Visagieba ge mî. ǁîb ge ge mî, science-i a ǁnā ǁkhāǁkhā!âgu di ǀgui, !hūbaiba ge ǀkhara ti a mûtsoatsoa kaiba tsî nēs ǀkha main ǂharugub !nâs tsîna kaise a ǂhâǂhâsaba.

!Gomenǁgams di !nakaǂnôa !ā!khōmai-aos, Mina Hangulas ge mîs ge, !ā!khōmais tsîn nē ǁguiris Langer Heinrich Uraniums tsî Paladin Energy Groups hâra disa ra !gôa!gâ !khaisa.

Noxopas gere gangansa mâbas ge, hoa !norasasib ǀkhas ge mainsa nē sîsenna a dītoa tsî ǁkhāǁkhāsenaona tātsēn ǀuru tide !ēs ǁîn !goaxa ǁaeba a ǀkharaǀkhara ǁkhāsa a mās !aroma.

Hangulas ge ǁkhāǁkhāsenaona !gâi tsî ǂhanu ǀgaub !nân nē laboratoriumra nî sîsenū, ǀhonkhoesisa-ū tsî nî !ûi!gâsa gere ǂâiǂâi!nâ.

The post Tutalenib science laboratoriumra ge N$500 000 ǀkha ge dī-unuhe appeared first on New Era.