Soomaaliya oo xudun u noqotay khilaafka Uganda iyo Turkiga

Soomaaliya ayaa noqotay qodob muhiim ah oo ku jira khilaafka sii xoogeysanaya ee u dhexeeya Uganda iyo Turkiga, kadib markii Kampala ay hakisay dhammaan iskaashigii militari iyo difaac ee Ankara.

Warbaahinta Middle East Eye ayaa sheegtay in khilaafku si weyn ugu saabsan yahay mustaqbalka ciidamada Uganda ee jooga Soomaaliya, iyadoo ilo ay soo xigatay sheegeen in Muqdisho ay dooneyso in ciidamo badan oo Soomaaliyeed ay si tartiib ah ula wareegaan mas’uuliyadda amniga.

Uganda waxay Soomaaliya ku leedahay kumannaan askari oo qeyb ka ah AUSSOM, halka Turkigu uu si weyn u ballaariyay taageerada uu siinayo ciidamada Soomaaliya, gaar ahaan tababarka iyo qalabeynta ciidamada Gorgor.

Ilo ay Middle East Eye soo xigatay ayaa sheegay in Uganda ay waayi karto $60 ilaa $72 milyan sanadkii haddii ciidamadeeda laga saaro Soomaaliya, inkastoo dowladaha Soomaaliya iyo Uganda aysan si rasmi ah u xaqiijin tirooyinkan.

Khilaafka waxaa sidoo kale hareeyay kiiska Fred Lumbuye, oo Kampala doonayso in Turkigu u gacan geliyo, balse ilaha warbaahintu waxay sheegayaan in arrinta Soomaaliya iyo joogitaanka ciidamada Uganda ay ka weyn yihiin kiiskaas.

Go’aanka Uganda ayaa ku soo aadaya xilli Soomaaliya ay kordhineyso awoodda ciidamadeeda, isla markaana Turkiga uu sii xoojinayo kaalintiisa dhanka tababarka iyo difaaca.