Abraham Mwanyekange

Festus David nedina la shiivika nawa meengalo Bazzuka Namzee okwa ti ota ka pitifa okangalo kaye kedina moceilinga muJuni.

Namzee Odalele yokoShaango moshitukulwa Ohangwena.

Namzee okwa tameka oku imba eengalo mo 2013 komuningi woikwelengi Eddy Mamboflani Kombaye. Ovanhu vahapu oveke mu shiiva nawa mo 2022 eshi a pitifa okakasheta kedina ‘Efeinge ndi kale nonghalamwenyo yange’ oko ka kala nokudanwa oshilongo ashishe kovaholi vomusika. Moalbum omo omuna oungalo ngaashi Ndafimana, onkaro odhigu oshoyo ondubo. Bazzuka Namzee okwa lombwela Kundana ta ti moCeilinga eyandjo lomayele osho yo etwomukumo kovaholi vomusika.

“Ohandi londwele ovanhu opo va kale va kotoka kutya ovelineekela oolye pamakwatafano, ookaume osho yo moilonga,”ta ti.

“ Natu taleni nawa ovanhu tuli navo molwaashi efiku limwe ota va dulu veke tu tule momaupyakadi osho tashi dulu oku tukanifila eenghalamwenyo detu, ta ti.

Okwa ti eyoka ngee lili meembuli ito li mono manga ina li kulya. Ta ti ovanhu vetu li popepi ovo vanyika oshiponga kufye tete.

Bazzuka Namzee okwa weda ko ta ti okwa imba kwaasho a mona.

“Ovanhu ota vati ame onda ninga ongholwe, nonande vo kave wete eshi andi pitile musho. Ombili yokomwenyo kandi ina. Ovanhu otave ku longifile momauwa avo vene nokonima oto kala po oove auke tii,” ta ti. Okwa ti moCeilinga ota piti komufilo wa Juni.

Bazzuka Namzee kefi ashike omuimbi womusika ndele oku na ehangano laye lokutunga ledina Bazzuka investments. Okwa kumaida ovashikingalo opo va kufe omaifano a yooloka opo va dule okuli xupifa ngeenge keengalo taku shongola.

The post Bazzuka Namzee ota ka pitifa ‘moceilinga’ appeared first on New Era.