Abraham Mwanyekange

Oprograma yashanakulya osha nakulonga nedina la shiivika nawa ‘cash for work or food’ ota i yandje oyuuyemo pashimaliwa nopaikulya movanyasha koitukulwa yokonooli.

Opragrama ei ota i kufa po yo eemhumbwe doshiwana nokueta omayakulo popepi ngaashi eepate nomeva.

Shanakulya osha nakulonga oproyeka ya etwa po kepangelo okupitila mombelewa yomuprima ya andjakana noitukulwa opo ovanhu va longe oilonga yokeenyala vo tava futwa oshimaliwa ile va pewe oikulya kepangelo.

Oproyeka otai lalakanene okuyandja oilonga yopokafimbo kovanyasha osho yo Ovanamibia aveshe opo va mone oyuuyemo ile shokupalula pepunda.

Kansela woshikandjohoololo shaKongo Efraim Shipindo okwa ti oku udite nawa molwaashi oprograma ota i pula komesho nawa moshikandjohoololo shaye.

Shipindo edi okwe di popya eshi a talela po oproyeka yopate oyo ta i ufanwa Ehafo- Enyana-oshikuni-Olukula.

Shipindo okwa ti oproyeka yopate oya kuta ovanyasha veli 30 veli pyakidila nokukokola opate oyo.

“Opate eyi paife oili poku pwa ndi wete momwedi ta uya petameko ota i ka kala ya pwa. Nena hano ohandi lopota kutya ‘cash for work or food’ ota yandje oilonga koshiwana nonghee okwa pumbwa oku ya komesho,” ta ti.

Shipindo okwa twikila ta ti ovanamikunda aveshe va hala oku kufa ombinga moprograma yo e i nava ninge omaindilo okupitila mombelewa yaye omanga omwedi Juni ina u pwa ko. Okwa weda ko ta ti mOkongo paife oprograma oya tala keepate ngaashi Olukula- Eloolo-Onehanga. Ta ti okwa pandula oshiwana eshi shi udite ko oprograma no tashi longele kumwe nawa.

Omunashipundi woshitukulwa shaShana Abraham Kaushiweni okwa ti oprograma yo cash for work or food otai denge yo onghandangala moshitukulwa shavo.

Keshe oshikandjohoololo oha shi pewa oshimaliwa sha sho.

“Ohava hoolola nee ngee ova hala cash for work ile cash for food,” ta ti.

Okwa ti oproyeka imwe yo ‘food for work’ ili moshitukulwa oyo yo yomatala oshiwana oo taa tungwa pomukunda Omagongati.

“Otwa landa ashike oilongifo ndele hatu kutu oshiwana opo shilonge po oilonga oyo. Ovanhu oha tu va pe nee oikulya efimbo nefimbo opo va denge po ondjala,” ta ti. Okwa ti ovanhu vahapu ova mona mo omauwa mahapu.

“Oikulya oha tu lande ngaho oivelelwa, omaadi osho yo oufila omanga po ‘cah for work’ ovanhu ohava pewa oshimaliwa keemuma,” ta holola.

Okwa ti ota pandula epangelo eshi ta li twikile nokuvatela ovanhu momikunda.

Omupopiliko woshitukulwa shaShikoto Petrus Nehale okwa ti oprograma oimwe yomeprograma odo ta di vatele oshiwana shavo moshitukulwa.

“Eeproyeka dihapu hadi mono mo omauwa ongaashi eepate osho yo okufa ominino domeva.

Luhapu oha tu tale keemhumbwe domoshikandjohoololo oko,” ta ti.

Kansela woshikandjohoololo shaNehale LyaMpingana moshitukulwa shaShikoto Joseph Shilongo okwa ti oshikandjo shaye osha ningile elao odula ya dja ko eshi kwali osho sha pewa omauwa okupitila moprograma ei. “Otwa hangika tu li momhumbwe yomeva. Oimaliwa oyo twa pewa otwe i longifa okumboola eemboola nhatu domeva moshikandjo shetu,”ta ti.

– amwanyekange@nepc.com.na

The post ‘Shanakulya osha nakulonga’ ota denge po ondjala noluhepo appeared first on New Era.