ONGWEDIVA- Mayola wodoolopa yaNgwediva Naemi Amuthenu okwa yandja eembuto doihape noingumutulu kovakalimo vomodoolopa yaye Etitano opo va dule okueta po oikulya kuvo vene.

Amuthenu okwa ti edilaadilo eli okwa kala nalo nale eshi eya koshipundi ashike ka kwali eshi kutya ote shi ende ngahelipi opo a dule oku twifa ondjodi yaye shaashi kapa li pena oshimaliwa.

“Onda tameka oku talela po omangeshefelo handi kongo ekwafo leembuto, oihalaka, omaketifa oku tekela oimeno osho yo omaushosho,” ta ti.

Amuthenu okwa ti omangeshefelo aa a nyamukula ekemo laye ongaashi Indongo Toyota, Rani Group, Buildit no OSMED.

Okwa ti oproyeka oya kwafa ovakalimo modoolopa va fika po 80.

“Vahapu vomuvo onda didilika vena eenhele diwa dili konima yomaumbo odo dihena eshi dakunwa,” ta ti.

Okwa ti ei tai kakala omhito iwa opo va longe eenhele odo ndele tave di ningi oikunino.

Okwa twikila kutya nonande ei ya kala ondjodi yovakalimo vahapu, vamwe ka vali vena oikwafifohongo yokutwifa eendjodi davo.

Amuthenu okwa yelifa yo kutya odoolopa oina ovakulupe vahapu veli momaumbo, vehe na kutya ohava ningi shike.

“Ashike omunhu ngeenge okwa kala eli pyakidila noshikunino shaye, nena ngaha otashi mukwafa yo a kele ena ouluvi weli pyakidila,” ta ti.

Mayola okwa yelifila ovakalimo kutya otava ka pewa yo omadeu onomena wina oku dilila kouministeli wounamapya enasha noshikumungu eshi, nghee vena oku kuna oshoyo oku tekula oimeno opo idule oku vapa oikulya.

Okwa ti elelo doolopa natango ola yandja edu olo tali kaningwa oshikununino shovakwashiwana, osho nasho tashi kaningilwa ounamapya wakwata moiti.

Anneli Shishome omukalimo wa Ngwediva okwa ti omhito ei ovakala veifila ondjala efimbo lile.

“ Okutya ngaho paife otuna omhito yokulilongela kufye vena, fyee vali ngeenge otwa mono eteyo liwa, otuna yokuyandja oilonga kwaavo tava kala havetu landifile,” ta ti. Okwa ti onghalo otai kalunduluka lela shaashi otava kaxupifa lela shihapu ngeenge tashiya pokulanda oihape noingumutulu.

–taimihaihambo2000@gmail.com

The post Mayola waNgwediva a putula oshiwana shaye appeared first on New Era.