Howlo Samatabixin ah oo ka socda dhisme ku dumay Nairobi (Sawirro)

Waxaa weli socda howlgallada baadi-goobka iyo samatabbixinta dadka la rumeysan yahay inay ku hoos jiraan burburka dhisme maanta ku dumay xaafadda Islii ee magaalada Nairobi, caasimadda Kenya.

Shaqaalaha gurmadka iyo dadka kale ee goobta ku sugan ayaa ku hawlan raadinta dad laga yaabo inay ku xannibmeen burburka dhismaha, iyadoo ay jirto cabsi laga qabo in khasaaraha nafeed uu kordho inta ay socdaan howlgalladu. Maamulka ayaa sidoo kale dadaal ugu jira sidii goobta loo gaarsiin lahaa qalabka lagama maarmaanka u ah samatabbixinta.

Maxamuud Maxamed, oo dukaan ku lahaa dhismaha dumay, ayaa sheegay inuu si dirqi ah uga badbaaday dhacdada, inkasta oo ay soo gaareen dhaawacyo fudud. Hadalkiisa ayaa muujinaya sida ay dadka ganacsatada ah iyo dadka kale ee ku sugnaa dhismaha ugu soo wajahday xaalad halis ah markii uu dhismuhu dumay.

Guddoomiyaha Ismaamulka Nairobi, Johnson Sakaja, ayaa gaaray goobta uu dhismuhu ku dumay, isaga oo sheegay in mudnaanta koowaad ay tahay badbaadinta dadka laga yaabo inay ku hoos jiraan burburka. Wuxuu xaqiijiyay in la keenay qalab lagu qaadayo burburka, si gurmadku u gaaro dadka ku xanniban.Sakaja ayaa sheegay in dhismuhu haystay oggolaansho dhisme, balse aanu lahayn shahaadada oggolaanshaha lagu degi karo, taasoo su’aalo ka dhalisay sida dhismaha loogu oggolaaday in qaybo ka mid ah laga ganacsado iyadoo dhismihiisu weli socday.

Guddoomiyaha ayaa sidoo kale ku baaqay in lala xisaabtamo dadka ku lugta lahaa dhismaha haddii baaritaannadu muujiyaan dayacaad ama jebin sharci. Booliiska Nairobi ayaa sheegay in baaritaan la bilaabay si loo ogaado sababta keentay dumista iyo cidda mas’uuliyadda qaadaysa.

Warbaahinta Kenya ayaa sheegtay in dad dhowr ah laga cabsi qabo inay ku hoos jiraan burburka, iyadoo kooxaha gurmadku ay adeegsanayaan cagaf-cagafyo iyo eeyo loo tababaray raadinta dadka si loo baaro meelaha ay suuragalka tahay inay dad ku jiraan. Tirada rasmiga ah ee dadka la la’yahay iyo khasaaraha guud weli si buuxda looma xaqiijin warbixinnadii ugu dambeeyay ee la helay.

Dhacdadan ayaa hakad gelisay ganacsigii iyo isu socodkii qaybo ka mid ah xaafadda Islii, oo ka mid ah goobaha ganacsi ee ugu mashquulka badan Nairobi. Dadweyne badan ayaa isugu soo baxay goobta, taasoo ku khasabtay booliiska inay xakameeyaan dadka isugu yimid si waddooyinka loogu baneeyo gaadiidka gurmadka.

Burburka dhismahan ayaa mar kale dhaliyay walaac ku saabsan badbaadada dhismayaasha dhaadheer ee Nairobi, kormeerka goobaha dhismaha iyo fulinta shuruucda lagu xaqiijiyo in dhismayaasha la dhisayo ay waafaqsan yihiin qorshayaasha la ansixiyay.

HOOS KA DAAWO SAWIRADA