Dj Munene a yambidhidha shanakulya oshanakulonga no N$20 000

**Victoria Immanuel **

OKATYALI – Omupopi gokoradio Fillemon Amoolongo, a tseyika nawa nedhina Dj Munene okupitila moombelewa onene dhangoloneya gwOshana Etitano okwa yambidhidha oomeme nootate taya the omunino gomeya kOkatyali noshimaliwa sha thika poN$20 000.

Munene okwa yambidhidha aantu mboka taya the omunino gomeya pokati komikunda kOmukandu-Okapopo noshimaliwa N$20 000 osho wo iikulya.

Omunino ngoka tagu thewa, enene dhilaadhilo lyaNgoloneya gwaShana Hofni Iipinge, sho a hala okuyumudha oshikunino shiiyimati niikwamboga shoka shina oohekta hetatu.

Munene ngoka a gandja omayambidhidho okwa fatulula esimano lyeyambidhidho a gandja.

“Uuwanawa wemano lyokutha omunino nguka kawu shi ashike womeya ga tameke okuenda, ihe otau keeta wo ehumokomeho momukunda,” ta ti ngaaka.

Ta ti, oproyeka ndyoka otayi ka yambidhidha oyendji unene aanyasha. Okwa indile natango aanyasha naanangeshefa opo ya yambidhidhe mpoka taya vulu opo oproyeka ndyika yi pwe ngaashi ya nuninwa.

Kansela gwoshikandjohogololo Okatyali Johannes Fillipus okwa pandula komayambidhidho gongushu ga pewa oshigwana tashi longo.

“Ota tu pandula oshoka shoka sha gandjwa mpaka nena otashi ka yambidhidha momikalo dha yooloka opo ondjodhi ya shoka tashi longwa yi ninge yoshili,” ta pandula.

Johannes okwa kwashilipaleke kutya epangelo ota li tsikile okuyambidhidha okuhwepopaleka onkalo yAanamibia osho wo ekandule po lyookwaana iilonga moshilongo.

Ngoloneya gwaShana Iipinge okwa pandula wo Munene sho a yambidhidha oomeme nootate nomakwatho gongushu.

–vkaapanda@nepc.com.na

The post Dj Munene a yambidhidha shanakulya oshanakulonga no N$20 000 appeared first on New Era.