Angola uuvaneke okukandula po uupyadhi tau ningwa kAangola moNamibia

Victoria Immanuel

Epangelo lya Angola olya kwashilipaleke kutya olyi na ontseyo kombinga yuupyakadhi tau ningwa kAangola yeli moNamibia, onkene oye li metifa okukundathana nkene yena okuhwepopaleka onkalo.

MoNamibia, omu na aanona aashona yAangola yeli momapandaanda osho wo aalandithi yomomapandaanda, ya taaguluka shaali paveta omolwa uuhupilo.

Dhoka okwa li dha popiwa kuNgoloneya gwoshitopolwa shaHuila Nuno Bernabe Mahapi Dala pethimbo lyomauliko giipindi ga ningwa omwedhi gwa zi ko.

“Otushi shi nawa kutya oku na omaupyakadhi geli koNamibia, taga ningwa kaakalimo yomoshilongo shetu, ihe omolwa uumwayinathana tu na pokati ketu, twiidhidhimikileni manga ta tu ya,” ta indile ngaaka.

Oshifokundaneki shika oshiwike sha zi ko, okwa li sha tsakaneke aanona yAangola yomimvo tadhi tengenekwa okuza puntano sigo heyali, taya tondokele oohauto tandhi kankama kooha nopate mOshakati, opo wu landithe shoka wa humbata, ngele itau indile oshimaliwa shoku landa sha shokulya.

Petameko lyomumvo nguka natango okanona kamwe kOkaangola oka li ka lyatwa kohauto mOshakati, lwopOkatana Service, sho kwa li taka taaguluka opate.

Elago enene oka hupu no kali ka ka mona uuhaku meendelelo.

Ayihe mbyoka otayi holoka omolwa onkalo yataalela aanona mboka, ya taaguluka oku za koshilongo shawo omolwa onkalo ndyoka ya nyayika, yondjala tayi ya tidha ko.

Nonando taya tondokele moNamibia omolwa uuhupilo, ya pewe iilonga yoko make, shoka natango uupyakandhi uuna aanona mboka ya pewa iilonga moNamibia oshoka oye li kohi yomimvo, oye na okukala yeli moosikola.

Shoka osha ta li ka ko onga omahepeko, nonando oya hala okulonga ya mone oshimaliwa.

Uuministeli wokakwashikekookantu, owa pitithile omushangwa kutya, owu na ontseyo kombinga yonkalo yaanona mboka ye li mehalakano moondoolopa, Oshakati, Ondangwa nOngwediva.

“Uuministeli owu li metifa okukonakona nkene wu na okulonga nomandiki galwe miitopolwa moka, opo uupyakandhi mboka wataalela aanona mboka wu kandulwe po,” wa li wa fatulula ngaaka.

Ya ti, poonkatu ndhimwe ngaashi ndhoku tulwa moosikola, pa ekotampango lyaNamibia, aanona mboka oye na okukala yena oonzapo ndhomavalo, ndhoka kaaye na, naamboka uupyakadhi wa gwedhwa ko.

“Omapangelo gaali gaAngola naNamibia oga kala nokulongela kumwe omanga oshilongo inaashi manguluka, no taga tsikile okulongela kumwe okusila oshimpwiyu aantu yawo,’’ ta ti ngaaka.

Kristophina Nakanduungile, omunambelewa yambindhindhi gwaNgoloneya gwoshitopolwa shaShana okwa ti ombelewa yoshitopolwa shaShana oya kambandhala okukwathela mpoka tayi vulu, ihe ina shi kwathela sha.

“Kape na oprograma yili po nkene Aangola ye na okuyambindhindhwa, sho shoka aantu mboka kaye na nkene yena okuyambindhindhwa pethimbo ndika,” ta fatulula ngaaka.

Ta gwedha po kutya nonando oya shunwe koshilongo shawo, konima yominute ndho ntumba, natango owuli mumwe nayo.

Yina yokanona kamwe ngoka ali komeho gaanona mboka yatatu okwa ti ke na nando ohokwe nedhiladhilo lyokushuna koshilongo shawo, oshoka anuwa oku na ondjala.

“Koshilongo shetu ka ku na aantu yena ohenda nando, oto si ondjala kaape na ngu teku yambidhidha, nepangelo lyetu ka li na nase,” ta po pi ngaaka.

Ta ti, moNamibia omu na aasamaria aanamutimahenda mboka haya gandja okashona yena, nonando kashi shi oshindji, oshi vulithe owala.

–vkaapanda@nepc.com.na

The post Angola uuvaneke okukandula po uupyadhi tau ningwa kAangola moNamibia appeared first on New Era.