Oikombo 26 ya dipawa nokufipwa ohonde keima lihe shiivike

ETOPE- Ovakalimo vomomukunda Etope moshitukulwa shaHangwena ova lulilwa keima lihe shivike eshi vati la dipaa oikombo yavo 26, sha ningwa oshivike sha dja ko.

Ova hokolola tava ti eima e li oha li fipi ashike oikombo ohonde ndele ta li faduka po.

Ovakwashiwana ova lombwela Kundana tava ti paife ohava nangala ve kwete omipini, ve li oupafi va ningila kutya ngeenge eima ola nhukile koshiunda otave li denge nomipini.

Otaku hokololwa kutya oikombo ya dipawa oya dja momaumbo a yooloka, sha ningwa omafiku a yooloka efimbo loufiku.

Ovanhu ova hokolola tava ti ti ohava mono ashike omakodolo eshi eima la enda.

“Ngeenge owa hange la enda pedu oto hange po omakodolo a kula, osho tashi ulike kutya eima ola pama shaashi ota li fipi oikombo ohonde,” umwe ta hokolola.

Fredinard Vatileni oye umwe naye e na oikombo yaye ya dipawa keima eli, nokwa hokolola ta ti ngeenge va nangala ohava udu ashike eshi oikombo tai kwena.

“Eshi nda penduka onda hanga nale oikombo ivali ya fya, ya fipwa ohonde,” ta ti.’

Okwa ti eima ola faduka po la nhuka oshiunda ta li lotoka li udite ombili eshi la fipa oikombo ohonde.

Okwa hokolola ta ti omaumbo omo mu na oikombo ya dipaa oku li oushiinda.

Vatileni okwa ti ove na oumbada kutya pamwe natango eima e li ota li aluka ndele ta li mane po oikombo yavo.

Omudo wa dja ko, Kundana okwa li natango a pitifa onghundana kombinga yeima lihe shivike la dipaa ndele ta li fipi eembwa heyali ohonde kEndola moshitukulwa shaHangwena.

[email protected]

The post Oikombo 26 ya dipawa nokufipwa ohonde keima lihe shiivike appeared first on New Era.