Wafdi Soomaali ah oo kulamo muhiim ah kula yeeshay hay’adaha Morooko.

Wafdi ka socda Dowladda Federaalka Soomaaliya oo booqasho ku jooga dalka Morooko ayaa kulamo la yeeshay wasaarado iyo hay’ado kala duwan oo dalkaas ah, iyadoo looga hadlay xoojinta iskaashiga labada dal.

Kulamada ayaa diiradda lagu saaray tamarta, macdanta, batroolka, biyaha iyo beeraha. Hay’adda MASEN ayaa muujisay inay Soomaaliya kala shaqaynayso horumarinta tamarta qorraxda iyo dabaysha, halka dhinacyada macdanta iyo batroolkana lagu qorsheeyay iskaashi farsamo iyo tababbarro loo fidiyo shaqaalaha Soomaaliyeed.

Sidoo kale, labada dhinac ayaa ka wada hadlay diyaarinta heshiis is-afgarad oo lagu xoojinayo iskaashiga dhinaca beeraha iyo horumarinta wax-soo-saarka.

Wafdiga Soomaaliya waxaa ka mid ah mas’uuliyiin ka socda wasaaradaha Warfaafinta, Beeraha iyo Ganacsiga, Rugta Ganacsiga Soomaaliya iyo ururrada bangiyada dalka. Sii-hayaha Safiirka Soomaaliya ee Morooko, Cabdifataax Siciid Caynab, ayaa sidoo kale qayb ka ah wafdiga.