Eeposa doupangi shi lindi manga

Ouministeli wouhaku owa holola kutya i tau ka pitifa vali manga eeposa dovapangi. Oilonga yovapangi i tai ka pitifwa vali manga okudja neudo fiyo omomudo tau ya muApilili.

Edi oda yelifwa kOmukulunhuwiliki mouministeli wouhaku nonghalo nawa Penda Ithindi kutya eeposa otadi kalekwa manga molwa oshimaliwa.

Ithindi okwa holola kutya ouministeli owe li hanga momhumbwe yoshimaliwa, osho sha fininika va kale i tava kutu vali manga shaashi ka pe na oshimaliwa shokupitifa eeposa edi.

Epangelo ota li ka mona ashike oshimaliwa momutengekwafaneko woshimaliwa shodula tai landula muApilili. Okwa ti mopaife ouministeli itau dulu okumona vali oshimaliwa.

Ithindi okwa ti eeposa doilonga edi tadi twikile nokupitifwa ode di ashike dovapangi ile ovanambelewa vouhaku ava vaya moipundi yetulumuko ile va fiya po oilonga nomalalakano elili noku lili.

Okwa twikila kutya neudo ova yandja eemhito doilonga mounisteli wavo da fika po1 770 odo va yandja sheli kolelela koshimaliwa shomutengenekwafaneko oo wa li wa pewa ouministeli u longife momukokomo wodula kepangelo.

Ithindi okwa twikila kutya neudo ouministeli owa li wa pewa eemiliona N$185 okudja momutengenekwafaneko woshimaliwa sheedula 2025/26.

“Ngeenge tashi ya keemhito doilonga, otwa pondola okuyandja oilonga twa longifa oimaliwa yomomutengenekwafaneko. Otwa kuta ovanashilonga veli 814, ovo veli hongela omifano ayooloka, omo mwa kawatelwa ovapangi 449, eendokotola dili 134. Otwa kuta eendokotola da yooloka ngaashi eendokotola domayoo osho yo ovanambelewa vokoikondo ya yooloka mouministeli veli 170,” ta ti.

Iithindi okwa ti ovanhu aveshe ava va kutwa ova andjakanekwa koipangelo ya yooloka moshilongo opo va ka yandje omakwafo moshiwana.

“Ekuto lovapangi ava ola landula onghalo yokoipangelo unene oyo ya kala i na omhumbwe yovapangi neenghono,” Ithindi ta yelifa.

Okwa twikila kutya nokuli oipangelo imwe oya li ashike hai longo nande fiyo onano ile oheyali yokomatango ashike paife ohai longo oule wefiku alishe oule weetundi 24.

Omukulunhuwiliki mouhaku okwa lombwela ovapangi ava opo va djale omanguwo, va twikile okushanga oukonakono vavo nelitulemo ovo veli lepo okutala ngeenge ovapangi oveshii ngaho eshi vena oku yandja moshiwana una vaka mona eemhito doilonga.

“Onda hala yo okutwa ovapangi ava tava longele komikunda omukumo opo va diinine oilonga yavo oko veli shaashi ohava kala va hala oku tembukila keedoolopa molwa onghalo yoko mikandi oyo fimbo limwe ihava dulu okulidiinika, veli dinike shaashi epengelo oleli longekida oku lundulula eenghalo.

“Manga mwa teelela eemhito doilonga, onda hala mufye oshisho kutya oinima yeni aishe oili peenhele nomwa wanifa po oupumbiwamukanda yeni okudja koNursing Board of Namiba koshi yoHealth Professions Council of Namibia (HPCNA).

*[email protected] *

The post Eeposa doupangi shi lindi manga appeared first on New Era.