Omalishangifo omambakumbaku epangelo okwa tameka

Kansela woshikandjohoololo shaKongo Efraim Shipindo okwa ti osha fimana ngeenge ovanhu tave li shangifa pefimbo omambakumbaku okupulula epangelo molwaashi ovanhu ohava kala va hapu ve li momusholondo.

Shipindo okwa yelifa ta ti ovanhu vamwe ove hole oku li shangifa omambakumbaku epangelo kwa lata ashike ngeenge ova mona mono omapya avakwao taa pululwa tete ohava kala tava tanguna

Edi okwe di popya onghela pefimbo a ninga eenghundafana naKundana omo a hokolola nghene sha fimana oku li shangifa omambakumbaku epangelo pefimbo.

Shipindo okwa ti oshiwana na shi li shangife keembelewa keshe di li popepi douministeli wounamapya.

“Omalishangifo okwa tameka nale. Ovanhu otava holoka momwaalu muhapu okukala va ninga votete momukweyo okupululilwa omapya avo,” ta ti.

Okwa hokolola ta ti omambakumbaku wepangelo oku na ombilixa mokufafanifa nomambakumbaku opaumwene.

Kansela okwa yelifa ta ti omambakumbaku epangelo ohaa futwa oshimaliwa shi fike N$350 mohekta imwe. Naashi otashi ulike kutya eumbo ngeenge li na ovanhu ve na oyuuyemo ishona navo otava dulu okufuta mbakumbaku.

“Eumbo ngeenge ola futa okamaliwa kashona kumbakumbaku nena omunhu ota dulu natango okuxupifa po okalimawa kokulanda oikulya meumbo nosho tuu oipumbiwa imwepo,” ta ti. Okwa kumaida oshiwana unene tuu ovo ve na oyuuyemo ishona opo va longife oombakumbaku vepangelo molwaashi ohava futwa ondado i li pedu. Okwa hokolola ta ti odula otai tameke nale okuloka momwedi tau ya onghee osha fimana ovanhu opo va longife omhito ei.

“Ovanhu ohava pululilwa omapya shelikwatelela komusholondondo womadina eshi ve li shangifa. Omunhu eli shangifa xuuninwa nena epya laye olo ta li xuuninwa okupulula,” ta ti. Shipindo ou natango eli omunashipundi welelo loshitukulwa shaHangwena okwa lombwela oshiwana shi li koikandjohoololo ya yooloka opo shi kale tashi pula omayele keembelewa dookansela nghene omambakumbaku epangelo aa e li shangifwa. Okwa ti natango, keembelewa dounamapya ohaku monika eembuto domaludi a yooloka hadi landwa ashike kondado i li pedu. Okwa ti elalakano loombakumbaku tava pululile oshiwana kondado i li pedu okukwashipaleka kutya omunhu keshe okwa mona omhito yokulonga oipalwifa yaye.

“Omunhu ngeenge okwa pulula epya laye lapwa ko ndele ta kunu mo omahangu nosho tuu, nena otashi kwafele okulwifa ondjala noluhepo,” ta ti. Okwa pandula epangelo eshi ta li twikile okueta omayakulo popepi noshiwana.

*-fhamalwa@nepc.com.na *

The post Omalishangifo omambakumbaku epangelo okwa tameka appeared first on New Era.