Oimbuluma yomexulilo shivike

Opolifi mexulilo shivike oya lopotelwa noku patulula oibofa moiningwanima ya yooloka, omo mwakwatelwa omafyo a holoka momikalo da yooloka oshoyo oulunga momikalo da yooloka.

Omafyo

Opolifi mexulilo shivike oya yakula oiningwanima yomafyo oyo yaholoka momikalo da yooloka. Moshiningwanima shotete omwa lopotwa olutu lomulumenhu weedula 45, leli tuwa pomunghulo opate lihena omwenyo pamwe noikutu yaye kOtjiwarongo. Opolifi oya wedapo yoo kutya nakufya okwa lika keenyiki.

Omulumenhu weedula o 40 natango okwa lopotwa eli tuwa ko Keetmanshop monduda yaye yokunangala ku kaume kaye. Nakufya okwa lopotwa yoo kutya okwali ena oudu womedimo oo takufekelwa wa eta opo axulife.

Olutu lomulumehu weedula 24 natango ola lopotwa leli tuwa mo Wanaheda moWindhoek li hena omwenyo kuina, konima eshi eli yasha nondjebo monhulo.

Ovapambele voo nakufya ova ovashiivifilwa omafyo omaludalo avo.

Omateyo omaumbo

Opolifi oya lopotelwa oibofa yomateyo omaumbo yafika puine oo atewa medoolopa da yooloka mexulilo shivike.

Moshibofa shotete omwa lopotwa eumbo latewa mo Kappsfarm, omo omufeekelwa a hanga oshihakanwa shakofa ndele teshi denge ongonyo yomoshipala noku shiningila omatilifo kutya ngeenge oshakuu mokule, ote shidipaa. Konima omufeekelwa meumbo okwa kufamo oshihauto noinima ikwao yambapa oshihakanwa oyo aishe yakosha ongushu yo N$ 151 000.

Mo Katutura moKhomasdaal omwa lopotwa ovalumenhu vatatu va ponhekela eumbo lonhumba moshitopolwa omo, noku ningila oihakanwa omatilifo, nokonima ova kakufamo oinima yakosha ongushu yo N$ 5300.

Opolifi natango oya lopota yoo eteyo leumbo momukunda Okatyali olo la tewa konima eshi omufeekelwa eheshivike eli teyela mondingosho ndele takufamo oinima ina ongushu yo N$ 16045.

Oinima aishe ei ya vakwa kapena nande oshimwe shamonikapo, nomakanaakono opolifi ota a pula komesho.

Oulunga woifitukuti

Opolifi natango oya lopta oulunga wapamba evako loinamwenyo yomufuka oshoyo oiloyo yoinamwenyo yomofuka.

Moshiningwanima shotete omwa lopotwa ovafeekelwa veli momwaalu inau tumbulwa veli tuwa keengaba daShikango vena okashako kena oshipa shongaka, osho shatengenekelwa ongushu yo N$ 50 000. Ovafeekelwa ava oveli tuwa kopolifi vahumbata okashako, nokonima eshi vapulwa veka tule pedu, yoo opolofi itale kutya mokashako omuna shike, aveshe ovalya onghaku.

Ko Witvlei okwa tulwa omulumenhu weedula 40 moipandeko konima eshi a hangika nombelela yomenye peumbo laye. Mokutala ombelela opolifi oyati ombelela oya kosha ongushu yo N$ 4000.

[email protected]

The post Oimbuluma yomexulilo shivike appeared first on New Era.