Ovanafaalama vahapu konooli otava keme kutya neudo ova dengwa pomutima neteyo ota li shongola omanga vamwe ova holola kutya inava likola mo sha. Ova holola kutya eteyo lodula ya dja ko xwepo vali.

Oongoloneya moitukulwa ya yooloka konooli opamwe nookansela ova yelifa kutya molwa omuloka ou wali inau enda lela nawa, ovanafaalama vahapu ope na oupu va ka kale va taalela oluteni nondjala efimbo lile.

Ngoloneya waShikoto Sacky Kathindi okwa ti neudo okwa li mosheendo osho shina sha noku talela po ovakalimo moshitukulwa shaye. Okwa ti okwa mona kutya vahapu ina va mona sha vo naava vafa va mona mo natango oipalwifa yavo ngeenge oye va fikifa keteyo la shikula ko elao.

“Onda kendabala oku unganeka ookansela voikandjahoololo ya yooloka opo va tameke oku hoolola osho yo omalishangifo ovanhu ava va pumbwa omakwafo moshitukulwa opo tu tameke oku ninga omalongekido oikulya yoshikukuta opo tu yambidide ovanhu ava,” ta ti.

Omanga Ngoloneya waMusati Immanuel Shikongo okwa yelifa kutya ovanhu moshitukulwa shaye ova li va longa lela ashike vahapu ove li kola mo ashike oipele vamwe ovo ngo to hale okutya xwepo.

Okwa twikila kutya ovanafaalama vahapu ova li va lima diva, nodula eshi yafa ya kasheka po kashona vahapu ova kakala vafa ve li teeka kashona.

“Konima eshi odula ya ka aluka vali, ova hangika nale va sholola na ina va twikila vali neendima davo,” ta ti. Shikongo okwa ti okwa hala ashike oku twa ovanafaalama vaye vahapu omukumo kutya ina va kala vali hava sholola ngeenge odula ya sheka shaashi otave li imbi eteyo liwa loo ola pama.

Kansela waNgenga moshitukulwa shaHangwena Joseph Nenghwanya okwa ti ye okwa kunghilila ovakalimo vomoshitukulwa shaye va ha landife po oilya yavo ko AMTA va ningile komahainga.

“Vahapu ngeenge ova lalakanene oimaliwa yopokafimbo, vo tava fiye omaanda avo a yela ova teelela va kale va taalela ondjala nefimbo lile,” ta ti. Ovakalimo vahapu koshitukulwa shaHangwena unene ava va tungila popepi neengaba daNamibia na Angola navo ova hangikile kefundja olo la li la piyaaneka omapya avo. “Vamwe omapya avo okwa li ashike eli koshi yomeva omanga vamwe oilya yavo ya file komeva,” ta ti.

Nenghwanya okwa ti ota kendabala apa ta dulu opo ovakalimo vaye va kale va fiilwa oshisho.

-taimihaihambo2000@gmail.com

The post Ovanafaalama va dengwa pomutima keteyo loneudo …vamwe vati ina va likola mo sha appeared first on New Era.