Qoys Kenyan ah oo dalbaday meydka wiilkooda oo ku dhintay dagaalka Ukraine.

Qoyska Matiabe Onchari, oo 38 jir ahaa kana soo jeeday tuulada Nyamondo ee deegaanka South Mugirango, gobolka Kisii ee Kenya, ayaa dowladda dalkooda ka dalbaday in loo soo celiyo meydka wiilkooda, kadib markii ay heleen xog sheegaysa inuu ku dhintay dagaalka Ukraine isagoo ka barbar dagaallamayay ciidamada Ruushka.

Qoyska ayaa sheegay in Onchari uu markii hore Kenya uga baxay isagoo sheegay inuu shaqo u aadayo dalka Qatar, balse markii dambe ay heleen xog tilmaamaysa inuu ka mid noqday ajaanib u badan Afrikaan oo loo geeyay Ruushka, kuwaas oo ka qeyb qaatay dagaalka ka socda Ukraine.

Waxay dowladda Kenya ka codsadeen inay arrinta soo farageliso, isla markaana ka shaqeyso in meydka wiilkooda dib loogu soo celiyo dalkiisa si ay u aasaan.

Kenya ayaa horey u diiwaangelisay qaar ka mid ah muwaadiniinteeda la sheegay inay u safreen Ruushka, kuwaas oo qaarkood lagu soo warramay inay ku dhinteen dagaalka, halka qaar kalena ay gacanta u galeen ciidamada Ukraine.

Ilaa hadda, dowladda Madaxweyne William Ruto kama aysan hadlin si rasmi ah kiiska Matiabe Onchari.