Kape na ou a mangwa natango mekwatafano lomunyeka wo N$70 000 – Shilelo

OSHAKATI- Omukulunhu wopolifi moshitukulwa shaShana Commissioner Andreas Shilelo onghela okwa koleka ta ti fiyo onena kape na omunhu a kwatwa po mekwatafano lomunyeka woshimaliwa shi fike poN$70 000, osho sha nyekwa omulumenhu mOshakati.

Oshiningwanima eshi osha ningilwa molukanda Uupindi mOshakati, konima yoivike ivali efimbo longula.

Shilelo okwa ti natango opolifi oye li pyakidila nokuninga omakonakono omoule kombinga yoshikumhungu eshi.

Okwa pula oshiwana, o u e na ouyelele kombinga yookalyamupombo ava opo shi lopotele opolifi keshe ili popepi.

Opolifi oya hokolola tai ti omulumenhu weedula 58, okwa nyekwa vati oshimaliwa konima eshi a nana oshimaliwa osho tuu eshi po Bank Windhoek poshitaasi shakula shaShakati.

Opolifi oya hokolola tai ti, nakuningwa oshihakanwa okwa li a shinga otuwa okudja kombaanga a uka kUupindi aka tale ko oipumbiwa yaye imwe ashike vati opo ashike eli po, okwa dja ashike okatuukala kamwe oko ka tula otuwa yaye komesho ndele umwe temu ulike ondjebo noku mu kufa oimaliwa.

Konima vati omwa dja ovalumenhu vavali, umwe natango e na odjembo noku mu kufa okadjato oko kwali ke na oshimaliwa.

Ovafeekelwa ove mu nyeka yo eeshapi dotuwa nokandjato kaye kanini omo mwa li mu na N$1 000 osho yo elyenge laye mofingo.

Otaku hokololwa pehe na o u a monifwa oshiponga moshiningwanima eshi.

Shilelo okwa pula oshiwana opo shi twikile okulongela kumwe nopolifi ngaashi okuyandja ouyelele molwaashi eshi otashi kwafele oimbuluma i kale ya kandekwa noupu.

–fhamalwa@nepc.com.na

The post Kape na ou a mangwa natango mekwatafano lomunyeka wo N$70 000 – Shilelo appeared first on New Era.