Nampower a yambidida eefikola mOshana … oundjuwo, eengulufikola, eengulu doudindoli

Ehangalo lokuandjakaneka olusheno nedina la shiivika nawa NamPower ola yambidida eefikola nhatu moshitukulwa shaOshana.

Ofikola Etambo Combined oya yambididwa eshi ya tungilwa ongulu youdindoli osho yo oilongifo yongushu yoshimaliwa shi fike poN$559 837.51.

Omanga endiki leefiye la shiivika nawa Oonte OVC Center mOndangwa la pewa ekwafo eshi la tungilwa oundjuwo vongushu yoshimaliwa shi fike N$423 874.00.

Omanga ofikola ya Shikoyeni Primary ya pewa ekwafo koNampower eshi eengulu dayo da tungululwa noku ningilwa yo onhele yokudanaukila ounona aishe kumwe oya pula oshimaliwa shongushu i fike N$696 55.40.

Nampower okwa yandja ekwafo alishe e li kongushu yoshimaliwa shi fike pomiliona N$1 (N$ 1 053 366,91).

Ehangano olo tuu eli ola tungila ofikola yedina Otshipya Combined moshitukulwa shaMusati eengulu dofikola, oshivike sha dja ko.

Omukulunhu wehangano loNamPower Otilie Mujoro okwa ti ongulu yofikola youdindoli oyo ya tungilwa ovahongwa otai keva kwafela opo va kale tava longo noupu moilongwa yavo youdidoli.

Natango okwa ti ounona vofikola ovo va tungilwa eengulu dofikola dipe eshi otashi va kwafele opo va kale tava longelwa ponhele ya manguluka.

“Kounona nyee vofikola eli olo efimbo liwa nokulonga noudiinini opo mu hange eendjodi deni, longifeni oinima e i mwa pewa noukeka, nye mu i kwa tele po opo i ka longifwe nokepupi taliya,” omukulunhu wehangano loNamPower ta ti.

Mujoro okwa ti endiki leefiye eli la tungilwa oundjuwo eshi otashi va kwafele opo va kale va amenwa neembakiteli otadi va kala kokule noku vakaleka momudingonoko wa yela.

Ngoloneya woshitukulwa shaShana Hofni Ipinge okwa ti okwa pandula ehangano loNamPower eshi la yambidida eefikola domoshitukulwa shaye.

Ipinge okwa kunghilila ovahongwa opo va longife nawa omatungo oo va pewa opo a dule okulongifwa nokepupi ta li ya.

*[email protected] *

The post Nampower a yambidida eefikola mOshana … oundjuwo, eengulufikola, eengulu doudindoli appeared first on New Era.