Omukifi wekondo nelaka tau xwepopala… ina u kwata oimuna oule woshivike

Ouministeli wounamapya, eeshi omeva, nomadu owa holola kutya moule woshivike ashishe eshi sha dja ko, ouministeli inau didilika nande oshinamwenyo sha kwatwa komukifi wekondo nelaka moshitukulwa sha//Kharas ile moZambezi.

Edi oda yelifwa komupopiliko wouminsteli Romeo Muyunda pefimbo a li ta yelifile oshiwana kombinga yoshikumhungu shomukufi o u moitukulwa ivali.

Muyunda okwa ti fiyo opapa omwaalu weefaalama natango da fika po18 moshitukulwa sha//Kharas odo ashike da didilikwa da monika omukifi wekondo nelaka noimuna 131 oyo ya li ya didilikwa nale i na omukifi wekondo nelaka natango oyo ashike i na omukifi o u.

“ Oimuna aishe e i oili mewiliko loshipangelo sha Karasburg, oko ku na oshikondo shouhaku woimuna,” ta ti.

Muyunda okwa twikila kutya oshikonga shokuninga omakonakono omukifif wekondo nelaka paife oshe li hanena konooli. Ta ti eefaalama da fika po10, oda yandja oimuna yado i ningilwe omakonakono opo oimuna i dule okutalika ngeenge oili tuu moukelele.

“Omakoonakono a ningilwa eefaalama 10 natango okwe li pyakidilwa nao kovakonakoni vomukifi wekondo nelaka opo a dulwe okuyandjwa moshiwana,” ta ti.

Muyunda okwa twikila kutya oiministeli owa unganeka eeboloka dopokafimbo dili o18 odo da ningilwa oitukulwa ngaashi: //Kharas, Hardap, Khomas osho yo Otjozondjupa. Omainda okukeelelwa eandjaneko lombelela ile oinima yoikwamakondo okwa tulwa po nelalakano lokukondolola olweendo loimuna osho yo epitifo lombelela shi he li paveta.

“Natango oshikonga shovenda yomukifi wekondo nelaka osho sha tameka mo17 Oktoba moshitukulwa sha //Kharas nasho oshe li tula mo moilonga nepangelo ola unganeka eetima da fika po 19 odo tadi yandje omatunhilo koimuna moshitukulwa,” ta ti.

Okwa twikila kutya fiyo omo 28 Oktoba, oshitukulwa osha kendabala okuvenda eengobe da fika po7 402 meefaalama 81 moshitukulwa. Omupopiliko wouministeli okwa yelifa kutya moshitukulwa shaZambezi fiyo opaife ova didilika mo ashike omukifi wekondo nelaka momukunda umwe oo hau ifanwa Kalala.

[email protected]

The post Omukifi wekondo nelaka tau xwepopala… ina u kwata oimuna oule woshivike appeared first on New Era.