Ngoka a li omuniilonga mehangano lyomakwashilipaleko Daniel Kashima okwa popi kutya okwa li a tega oshimaliwa okuza kunakuninga oshihakanwa, noshimaliwa shoka okwa li e na oku shi pewa esiku a kwatwa po mekwatathano nuukengeleledhi woshimaliwa shoomiliyona N$2.
Pethimbo lyiihokolola yonkambadhala yokupewa oboloha mOmpangu yaMangestra gwaShakati, Kashima, okwa hokolola kutya okwa li a tega okupewa oshimaliwa kuAndalberf Shilongo momasiku 19 Mei ongoshitopolwa shiifuta yopangeshefa konima sho kwa li e mu indile ekwatho lyopashimaliwa.
“Momasiku 19 gaMei 2026, onda li noshimaliwa shongeshefa ndeshi tega . . . oshimaliwa shongeshefa [okuza] komusamane Shilongo molwashoka okwa li ndemu indile ekwatho lyopashimaliwa,”osho Kashima a popi ngaaka.
Okwa lombwele ompangu kutya Shilongo okwe mu dhengele ongodhi esiku ndyoka nokwe mu pula mpoka e li nolwanima okwe mu indile opo ya tsakanene poaputeka yi li popepi noshitaasi shopolisi yaShakati.
Kashima okwa popi kutya sho a thiki, okwa adha po omunambelewakonakoni, omupolisi Ignatius Kandenge. “Otwi ipopitha.
Nokwa lombwele ndje kutya okwa mona edhina lyandje mepeko lyopolisi mOshitaasi shopolisi yaShakati,”osho Kashima a popi ngaaka.
Okwa popi kutya Kandenge okwe mu fala kombelewa ye nokwe mu lombwele kutya okwa patululilwa oshipotha shuukengeleledhi opamwe naafekelwa yalwe.
Kashima okwa popi kutya okwa lombwelwa kutya oshipotha shoka oshinasha noshimaliwa shaShilongo shoka sha yakwa moMomentum Metropolitan.
“[Kandenge] Okwa pula ngele ondina ontseyo yasha kombinga yoshiningwanima shoka.
Okwa popi kutya molwashoka oshipotha shoka osha patululwa nopolisi, otandi tulwa miipandeko,”osho Kashima a hokolola ngaaka.
Kashima okwa lombwele ompangu kutya ndhoka dhendjondjo lyoshimaliwa shaShilongo okuza mMomentum Metropolitan kedhi shi.
Ashike omutamaneki gwepangelo Yeukai Kangira okwa pateneke ehokololo lyaKashima sho e mu lombwele kutya euvathano lye okutsakanena naShilongo kalya li nande li na sha niifuta yongeshefa yoshili.
“Tate, kwa li nande wa tegelela oshimaliwa shongeshefa.
Okwa li wa tegelela okukengelela tate Shilongo. Okwa li wa hala okuyaka oshimaliwa okuza kuye,” osho Kangira a popi ngaaka. Kashima ndhoka okwe dhi ikala nokwa lombwele ompangu kutya ye omunangeshefa gwoshili.
Kangira okwa londodha Kashima tati: “Iifundja yoye otayi ke ku etela pethimbo ndika lyeindilo lyoboloha”.
OMPANGELA YUUKENGELELEDHI
Kashima, ngoka oye gumwe gwomaalumentu taya tamanekelwa olunyala meyako lyoshimaliwa shoomiliyona N$2.2 mehangano lyomakwashilipaleko lyedhina Momentum Metropolitan noshimaliwa shoka okwa li sha pungulwa mehangano ndyoka komukalimo gwomOngwediva, Shilongo.
Pauyelele wa gandjwa komukonakoni Kandenge, oshimaliwa shoka osha ndjondjwa mo nokutuminwa kokambo ka patululwa noNamPost kohi yedhina lyaShilongo, nokambo hoka okapatululwa noodokumente dhuukengeleledhi.
Okuza mpoka anuwa oshimaliwa shoka osha lundululilwa kokambo kalwe komapungulilo sha ningwa pamalweetho gaali ooN$480 000 osho wo N$250 000 nolwanima oshimaliwa shoka osha kuthwa ko meendelelo.
Kandenge okwa popi kutya Kashima oye a talika ko ongomudhaninkandangala mompangela ndjoka yuukengeleledhi molwashoka iilonga ye oye mu pa ompito nuuthemba wokuya momapungulo goshimaliwa shaShilongo Omukonakoni okwa popi kutya Kashima okwa li i ithana omuniilonga omukulu gwa-Old Mutual Wilbard Anstino opo ya ninge oshigongi shompangela, nolwanima aafekelwa yalwe oya waimine elyenge lyompangela yuukengeleledhi mboka wopashimaliwa.
Aafekelwa yalwe oyo Michael Ndashaala, Shoopala Moongo osho wo omuniilonga omukulu moMomentum Metropolitan – Apollos Haupindi.
Kandenge okwa popi kutya oodokumente dhiifundja mwa kwatelwa omauyelele gopaumwene gaShilongo okwa li dha longithwa okupatulula uumbo moNamPost osho wo okweedhitha oshimaliwa.
Omukanda gwaKandenge okwa popi wo kutya oshipambu shoshimaliwa shoka osha longithwa okulanda iihauto itatu – shimwe shomiihauto mbyoka eshete (Mercedes-Benz C200) etokele lyaKashima, ndyoka lwanima lya kwatwa po kepangelo.
The post Omufekelwa gweyako lyoomiliyona ‘okwa li a tega oshimaliwa okuza kunakuninga oshihakanwa’ appeared first on The Namibian.
Follow the story
