NamWater a kuta ovanhu 240 okutunga ondama yomeva

OSHAKATI- Ehangano loNamWater ola yandja oilonga yopakafimbo kovakwashiwana 240 okukala tava longo moproyeka yokutunga ondama yomeva mOshakati.

Ovanhu 240 ovo va dja koitukulwa ya yooloka paife otava longo nondjungu okukala ve li monena oshimaliwa shavo.

Onghela, Ngoloneya woshitukulwa shaShana Hofin Iipinge okwa talela po onhele opo ta pa tungwa ondama yomeva mOshakati.

Efiku tuu olo, ngoloneya okwa ulikilwa nghene oilonga tai longwa mwa kwatelwa omashina okukala taa dindi omeva osho yo ominino da kula tadi tulwa po.

Iipinge okwa ti elalakano lokutalela po okutala nghene oilonga yokulonga ondama tai pula komesho osho yo okupwilikina omashongo oo aa taalelwa.

“Ondama ei oyo imwe tai kala ya kula moonoli tai ka andjaneka omeva koitukulwa yomonooli,” ta ti.

Ngoloneya okwa yelifa ta ti ehangano loNamwater ola fimana molwaashi ota li dana onghandangala ya kula moshilongo okukandula po omukunda womenota.

“Onda hafa okumona oilonga yokutunga ondama ei tai xumu komesho shaashi omeva okwa fimana moshiwana nokoimuna,” ta ti.

Okwa pandula natango eshi mwene wehangano olo ta li tungu ondama a kuta ovanyasha shaashi eshi otashi kwafele okulwifa ondjala noluhepo.

“Otashi ulike efano liwa ngeenge moshitukulwa muna oproyeka tai longwa kovanhu va dja kondje yoshilongo ashike natango otava yandje eemhito doilonga kovanhu va dja momudingonoko ou,” ta ti.

Iipinge okwa pandula epangelo mewiliki lOmupresidente Netumbo Nandi-Ndaitwah eshi ta li twikile okulonga noudinini okuandjaneka omayakulo koshiwana.

“Paife ovanhu itava ka dengwa vali kenota monooli shaashi ondama ei otai ka ongela omeva ahapu, a dindwa komashina,” ta ti.

Iipinge natango okwa ti okwa pandula shaashi ovanangeshefa moshitukulwa shaye vamwe navo ova mona omhito yoilonga eshi eeloli davo odo tadi longifwa pefimbo loilonga yodama ei.

Omukulunhuwiliki e kwetele komesho oilonga yoproyeka ei, Zhang Chuanlin okwa ti momudo tau ya momwedi Februali otava ka la va mana okulonga oproyeka ei.

“Oilonga otai ende nawa. Fiyo opapa ina tu didilika oupyakadi wa sha,” ta ti.

Okwa ti oshiwana sha kutwa otashi longo nelitulemo nokulifa komilandu da tulwa po.

Nghilifavali Matheus a dja mokulukanda Oshoopala okwa pandula oproyeka ei eshi a mona omhito yoilonga shaashi paife oha mono oshimaliwa shokuyambidida ounona vaye.

“Okwa li ashike ndi li meumbo ndihe na oilonga. Ngeno ka pali oproyeka ei ngeno osho kandi na oilonga,” ta ti.

*-fhamalwa@nepc.com.na *

The post NamWater a kuta ovanhu 240 okutunga ondama yomeva appeared first on New Era.