Mutyairi wemushika-shika opika jeri arova mupurisa

Ray Bande

MUTYAIRI wemotokari yemushika-shika ane makore 29 okubereka, uyo akaonekwa pakamera achirova mupurisa, akatongerwa kugara mujeri kwemwedzi gumi mushure mekuwanikwa aine mhosva dzinosanganisira kurova mupurisa, kuba, uye kutakura vafambi zvisiri pamutemo kuti awane mari.

Brenton Tsakatsa wekuChikanga 1, kwaMutare, akamiswa pamberi pemutongi wedare reMutare Magistrates’ Court, VaHonest Musiyiwa, avo vakamutongera kugara mujeri kwemwedzi gumi svondo rapera.

Zvisinei, mwedzi miviri yechirango ichi yakasendekwa parutivi nechitsidzo chekuti anofanirwa kuita hunhu hwakanaka, zvichisiya Tsakatsa achigara mujeri kwemwedzi misere izere.

Tsakatsa, uyo aimiririrwa negweta VaPassmore Gwizo vekambani yeMugadza and Chinzamba Legal Practitioners, akanga aramba mhosva idzi.

Dare rakanzwa kuti musi wa29 Chikumi, nenguva dza 10.20 mangwanani, mapurisa ainge achiita chirongwa che’Operation No to Mushika-shika’ pachiteshi chemafuta cheApex Service Station kwamuMutare apo chiitiko ichi chakaitika.

Muchuchisi, VaChris Munyuku, vanoti Constable Maxwell Mkumbuzi vainge vari pabasa pamwe chete naConstable Machazi naConstable Mazambara vachiona kutevedzwa kwemutemo nekusunga vatyairi vedzimotokari vanotakura vafambi zvisiri pamutemo.

Vanoti Const Mkumbuzi vakaenda kuna Tsakatsa, uyo aityaira motokari ine nhamba pureti dzinoti AHH 5611, ndokumuudza kuti ainge asungwa nekuda kwemhosva yekukwezva vafambi kana kuti kuita zvechihwindi.

Tsakatsa akamisa motokari yake, akabuda ndokuenda kunopikisana nemupurisa uyu, asati amurova kakawanda nembama.

Panguva yekukakavadzana uku, Const Mkumbuzi vakadonhedza baton stick yavo, iyo yakatorwa naTsakatsa ndokushandiswa kuvarova kaviri mumusoro uye kamwe paruoko rworuboshwe.

Dare rakanzwa zvakare kuti Tsakatsa akatyaira motokari yake achibva panzvimbo iyi mushure mekuona mumwe mupurisa achiuya.

Const Mkumbuzi vakakuvara panguva yekurowa uku uye vakaongororwa nachiremba. Gwaro rachiremba rinotsanangura kukuvara kwavo rakaburitswa mudare seumbowo.

Panyaya yekutanga yekurova kana kuramba kuteerera mupurisa sezvinotsanangurwa muchikamu 176 chemutemo weCriminal Law (Codification and Reform) Act, Tsakatsa akatongerwa kugara mujeri kwemwedzi misere.

Akawedzerwa mutongo wemazuva makumi matatu nekuda kwemhosva yekuba mushure mekuwanikwa aine mhosva yekutora button tsick yemupurisa wacho. Panyaya yechitatu yekutyora chikamu 37 chemutemo weRoad Motor Transportation Act nekutakura vafambi achivabhadhariswa pasina mvumo yakakodzera yekushandisa motokari inotakura veruzhinji, akatongerwa kugara mujeri kwemazuva makumi matatu.

Zvirango izvi zvakaita kuti awane mutongo wakabatanidzwa wekugara mujeri kwemwedzi gumi, asi mwedzi miviri yacho yakazosendekwa parutivi.

Pakupa mutongo, dare rakaona kuti Const Mkumbuzi vaiita basa ravo zviri pamutemo panguva iyo chiitiko ichi chakaitika.