Qaramada Midoobeey oo ka digtay xaalad halis oo ku wajahan Soomaaliya.

Hay’adda Caalamiga ah ee Socdaalka (IOM) ayaa ka digtay in ku dhowaad 874,000 oo qof ay ku barakici karaan gudaha Soomaaliya saddexda bilood ee soo socda, iyadoo roobab xooggan iyo fatahaado laga cabsi qabo inay saameeyaan bulshooyin horay ugu nuglaa abaaraha iyo barakaca.

IOM ayaa sheegtay in saadaal ay si wadajir ah ula diyaarisay Golaha Qaxootiga Denmark ay muujinayso in 874,319 qof ay barakici karaan inta u dhexeysa Oktoobar iyo Diseembar 2026, iyadoo fatahaadaha la filayo inay sababi karaan 92% barakacaas.

Madaxa IOM ee Soomaaliya, Manuel Marques Pereira, ayaa sheegay in boqollaal kun oo qof ay guryahooda waayi karaan toddobaadyo gudahood haddii roobabka iyo fatahaaduhu sii xoogaystaan.

IOM ayaa si gaar ah u tilmaantay Beledweyne iyo Gaalkacyo, halkaas oo qiyaastii 229,000 iyo 82,000 oo qof ay kala hor iman karaan khatarta barakaca fatahaadaha.

Hay’addu waxay sheegtay in fatahaaduhu waxyeello u geysan karaan dalagyada, wasakheyn karaan ilaha biyaha, isla markaana carqaladeyn karaan adeegyada caafimaadka iyo adeegyada kale ee aasaasiga ah.

IOM ayaa sidoo kale sheegtay inay heshay 14.4% oo keliya oo ka mid ah $16.62 milyan oo loo baahan yahay diyaar-garowga iyo wax ka qabashada fatahaadaha, iyadoo lacagtaas loogu talagalay in lagu taageero in ka badan 517,000 oo qof.

Hay’addu waxay beesha caalamka ugu baaqday inay si degdeg ah u bixiso maalgelin dheeraad ah, si loo xoojiyo digniinaha hore, qorshayaasha daad-gureynta, hoyga degdegga ah, biyaha nadiifka ah iyo adeegyada fayadhowrka.