Xulifei po omawelelo pefimbo lomakonakono – Opolifi

ONGWDIVA- Omukulunhu wopolifi moshitukulwa shaShana Commissioner Andreas Shilelo okwa popya ta ti oshiwana ina shi ninga vali welelo pefimbo e li lovanafikola tava shange omakonakono.

Okwa ti ombelewa yaye oya didilikwa eendingosho osho yo eengeleka tadi ningi omawelelo fiyo eevili domaufiku.

Pefimbo a ninga eenghundafana naKundana onghela, Shilelo okwa ti opolifi otai kala ya fika ponhele keshe tai lopotwa tai ningi omawelelo.

“Itatu ka fiya emanya la londa kulikwao shaashi opolifi otai ka longa nondjungu okukala ya kandeka omawelelo,” ta ti.

Shilelo okwa ti efimbo lomakonakono ola fimana molwaashi ei oyo omhito iwa kovanafikola ve li honge ndele tava piti.

“Ohashi pula omunafikola elitulemo ngeenge ta leshele ponhele ya mwena. Fimanekani ovanafikola novalihongi ngeenge tava shange omakonakono,” ta ti.

Shilelo weda po ta ti natango opena ovanhu vamwe hava i koilonga ashike ohava kala tava welelwa ngeenge tava fuda po.

“Ovanhu vamwe ohava longo eeshikofa doufiku. Osha fimana opo oovene veendingosho osho yo veengeleka va fimaneka ovashiinda shavo ndele ina va kala ashike tava lalakanene okulonga oshimaliwa,”ta ti.

Okwa yelifa ta ti opolifi itai ti kutya meendingosho ina mu shikwa eengalo ashike eengalo nadi danwe di li pedu.

“Ovanhu vamwe ove na omangelengele momaumbo avo aa e linyenge mokule. Osha puka okuninga omawelelo momapandaanda,” ta ti.

Okwa pula oshiwana opo shi longele kumwe okukondjifa omawelelo osho yo oimbuluma.

“Ovanhu naa va kale ve na eenomola dopolifi shaashi eshi otashi kwafele okulopota oimbuluma pefimbo,”ta ti.

Omwedi wa dja ko elelo lodoolopa yaNgwediva okwa li la pitifa omukanda kutya omunhu taka ninga ewelelo ota pewa ehandukilo a fute oshimaliwa shonhumba.

[email protected]

The post Xulifei po omawelelo pefimbo lomakonakono – Opolifi appeared first on New Era.