Va ongela oshimaliwa okukwafa omuhongwa a monifwa oshiponga komundilo

ONGWEDIVA- Ovanafikola osho yo ovahongifikola kofikola Elambo Combined ove li unganeka opo va ongele oshimaliwa shokuyambidida omunafikola pofikola yavo oo a mona oshiponga eshi a pila monduda.

Vilio Nekongo weedula 12, omuhongwa pElambo Combined e li mondodo onhihamano. Nekongo okwa pya olutu alishe muJuli neudo.

Omunafikola, okwa tambulilwa moshipangelo shaShakati omo e li ta mono epango lopaunamiti ashike oke li monghalo i li xwepo.

Otaku hokololwa kutya omunafikola o u okwa dja kofikola ndele ta hange onduda yaye ya tema omundilo.

Monduda omo okwa li mu na omaliko aye nokonima okwa nhukila mo, nelalakano lokukufa mo omaliko aye.

Otaku hokololwa kutya mupya munene eshi omunafikola ou a ka ya monduda ya tema omundilo, oikututu yaye oya haka omundilo ndele ta pi.

Omunafikola o u okwa ka kufwa mo ashike mondilo kovashiinda.

Omukulunhufikola pofikola Elambo Combined Filemon Dhikwa okwa hokolola ta ti omuhongwa okwa li tete a tambulilwa moshipangelo shopaumwene shoMedi Park mOngwediva.

“Okwa ninga omafiku 21 moMedi Park ta pangwa kokalata kopaunamiti kameme waye. Okakalata paife oka pwa oimaliwa,” ta ti.

Okwa ti pefimbo omunafikola e li moshipangelo, omukulunhufikola pamwe novahongifikola ova ninga onghendabala yokuongela oshimaliwa shi fike poN$3 700 ndele tava yandje kumeme wako.

“Paife ngaha onda yandje omikanda kovanafikola vomofikola yetu ve li 770 opo keshe omunafikola a yandje N$5, nelalakano lokuyambidida omunafikola mukwao,” ta ti.

Dhikwa okwa ti natango pamwe novahongifikola vakwao ove li pyakidila nokuongela vali oshimaliwa shokuyambidida omunafikola.

Omukulunhufikola okwa ti ofikola yavo o i na olukeno nomunafikola ou shaashi okwa mona oshiponga neenghono.

Okwa ti omunafikola ou oku na omaano molwaashi okwa kala alushe a piti e li ponomola yotete.

Dhikwa okwa weda po ta ti omunafikola ou natango okwa kala a kufa ombinga moinyangadalwa yomafiyafano yoshilongwa shounongononi.

“Okwa kala a mono omapapa mahapu shaashi oha longo noudinini,” ta ti.

Okwa hokolola ta ti omuhongwa wavo oku na omikalo nokukala ta ulike oshihopaenenwa shiwa kovanafikola vakwao.

Dhikwa okwa pula ovanangeshefa, omahangano a yooloka osho yo oveleli vopapolitika opo va yambidide omunafikola ou molwaashi okwa pumbwa oshimaliwa opo a shune koshipangelo shopaumwene.

Kansela woshikandjohoololo shEengodi Saara Shikokola okwa ti naye ombelewa yaye oya ongela oshimaliwa shifike N$7 000 ndele tava yambidida omunafikola ou.

Okwa hokolola ta ti oshiponga shomundilo eshi otashi nyemateke molwaashi osha etela omunafikola ou oulema.

“Otwa hala ashike a veluka ndele ta shuna kofikola opo a ka twikile nelihongo laye,” ta ti.

*-fhamalwa@nepc.com.na *

The post Va ongela oshimaliwa okukwafa omuhongwa a monifwa oshiponga komundilo appeared first on New Era.