Oshikuku sheexuxwa sha etela ovanyasha oilonga

OUTAPI- Adelheid Ambunda a dja mOutapi okwa tameka oshikuku sheexuxwa omudo 2021 nelalakano lokushakeneka epangelo ondjilakati tashi pitile mokueta po eemhito doilonga kovanyasha.

Okwa ti paife okuna oikuku ivali yeexuxwa, shimwe oshi li modoolopa yOutapi omanga shimwe oshi li momukunda Okathifitu Kahala, moshitukulwa shaMusati.

Pefimbo a ninga eenghundafana naKundana onghela, Ambunda okwa hokolola ta ti oha landifa omai osho yo eexuxwa dokulya.

“Onda kuta ovanyasha vatatu, ovalumenhu vavali nomukainhu umwe,” ta ti.

Okwa ti okwa tameka oshikuku shaye konima eshi a shakenekwa ondjilakati kepangelo omo kwa li a pewa oshimaliwa shokulanda eexuxwa neshina lokutendula omai.

“Onda pandula ouministeli wounamapya eshi wa shakenekange ondjailakati molwaashi eshi osha kwafela nge opo ndi tameke oshikuku eshi,” ta ti.

Okwa weda po ta ti epangelo ota li longo nondjungu okuyambidida ovanhu okutota po eeproyeka davo ngaashi okunino younamapya nosho tuu.

Ambunda okwa ti paife okuna eefikola mbali hadi lande omai kuye osho yo eenhele deehotela.

Okwa weda po ta ti natango oha landifa omai kovanhu kohadimwe tava di keenhele da yoolola.

“Oshi penge omukumo ngeenge ovanhu tava yambidida ongeshefa yange molwaashi oshimaliwa osho handi mono mo osho handi longifa okufuta ovanailonga,” ta ti.

Ambunda okwa ti oku li omunailonga keembelewa delelo loshitukulwa shaMusati ashike ondjambi yaya ina i wana okufutila ounona vaye tava fikola koiputudilo yopombada.

Okwa kumaida ovanyasha opo va kale tava ka konga ouyelele keembelewa douministeli wounamapya nghene tava pewa oshimaliwa shokutota po oikunino yaye.

Okwa weda po ta ti osha fimana ngeenge omunhu a tota po oproyeka yaye shaashi otashi mu kwafele okumona okamaliwa ka wedwa po shidulife ashike eshi ta xupu mondjambi.

“ Ode li longekida okukala da yandje omadeulo oshali komunhu keshe e nan ehalo lokutamke oshikuku sheexuxwa,” ta ti.

Okwa weda po ta ti elalakano okumona ovanhu tava xumifa oikuku yavo yeexuxwa komesho shaashi otashi kwafele okulwifa ondjala noluhepo.

Ambunda okwa hokolola ta ti okwa taalela omashongo ngaashi oikulya yeexuxwa ina ondilo.

“Ovanhu tava lande omai otava ende kashona. Oto hange eexuxwa da dala omai mahapu ashike ka pe na ovalandi, eshi oshi li eshongo linene,” ta ti.

*fhamalwa@nepc.com.na *

The post Oshikuku sheexuxwa sha etela ovanyasha oilonga appeared first on New Era.