Milao yakale ifilikanya bayahi baZambezi

KATIMA MULILO – Bayahi basikiliti saZambezi bafile liyanga kwaNdu yamilao kutalima sinca milao yakale, kutiiseza kuikambota ni sicaba ni kuyandulula buikalabelo, nebaize milao yeñwi haisa yelela nize ezahala ni litokwahalo zasicaba.

Lipilaelo zeo neli bulezwi kanako yamikopano yaNdu yamilao yaBubeli ni sicaba mwaKatima Mulilo, teñi sicaba nesinyazize Ndu yamilao mo ialabela kwalitaba zeswanasina bubangoki mwamabasi, kusebelisa lino zekola, buino bwabanana ni kabelo yalikhuta zasizo mwakueza milao.

Riaan Siyama nafitisize pilaelo kuamana ni milao yakuyola kwapuso yabukoba. Kungelela cwalo ni milao yeama mabato amuuna ni muuna, mi naize kuswanela kuba nikuikambota hande ni baeteleli basizo milao yeswanasina yeo haitalelezwa.

Hana alaba, Muñoli mwaNdu yaBubeli yaMulao Tousy Namiseb naitumelezi kuli Namibia isa sebelisa milao yakuyola, kungela cwalo ni mulao ozibahala wa Roman-Dutch ni Europa, hamoho cwalo ni milao yene tisizwe ki kamaiso yabukoba yaSouth Africa.

Naize milao yeo isa sebeza kono izamaiswa ki Mutomopuso, naekelize kuli naha hainyani hainyani isweli kutalima sinca milao yeo. Namiseb natalusize kuli ofesi yebona zaKutalima Sinca Mulao, mwatasaa Likolo laMulao, inyakisisanga kabutungi milao yakale nikufa likelezo hala milao yeswanela kufeliswa.

Na hatelezi kuli kutalima sinca milao kuswanela kuyelela ni kuikambota, kungelela cwalo ni kueza mikopano ni sicaba ni maofesi amañwi aswana inge likhuta zasizo. “Halutalimana ni lika zeo kaufela, liswanelo kamita lilwanisana ni liswanelo, mi luswanela kuzamaiseleza milao yeo,” nabulezi.

Kakusebelisa kusulula milwalo kakuba mitala, Namiseb naize lika zeama liswanelo zalikezo zabuntu hañata limema maikuto alitumelo zasilumeli, baeteleli basizo ni tutengo totubona zaliswanelo zabatu, kutisa kuli kuimbota kube kwabutokwa pili keto isikangiwa kale. Naitumezi kwabayahi kwakususueza Ndu yamilao kutalima litaba zeo.

The post Milao yakale ifilikanya bayahi baZambezi appeared first on New Era.