Omumbwe yomaumbo ya mana mo otai ningi omaumbo a kale e na ondilo moNamibia, osho tashi fiye Ovanamibia vahapu va kale vehe na nghee ve na okuninga ponhele ashike yokuya keebashu.
She likolela kolopota ipe yondado yomaumbo ya dja kehangano ledina Simonis Storm Securities, omulandi weumbo paife okwa pumbwa ondjabi yokomwedi i fike poN$44 000 opo a dule okulanda eumbo la fa li li xwepo.
Omunawino moipambele yomaumbo Namene Kalili okwa ti oupyakadi ou li ashike apa kutya omaumbo inaa wana omanga ovanhu vahapu ve a pumbwa: Namibia ota tungu unene omaumbo ashona pakuyelakanifa nomwaalu woshiwana.
“Ovanhu vahapu otava tembukile meebashu. Omaumbo aa e li po otaa landifululwa po opo ongushu yao i kale nokuya pombada,” Kalili ta ti.
Okwa ti Namibia okwa pumbwa okuwapaleka eenhele dihapu keshe odula opo omaumbo ahapu a dule okutungwa.
“Omaumbo e li o40, eenhele di li o40 penya, eenhele di li efele penya – inadi wana. Nava kale tava wapaleke eenhele di li lwopo5 000 kodula ndee kave li ashike nande opopepi noku shi ninga.”
Kalili okwa ti vali omikundu moshikondo shokutunga nado otadi ningi okuhapupaleka omaumbo kudjuu.
“Nande ngeno ou na okutunga omaumbo efele nena, oilongifo oto i mono noudjuu. Otashi tameke nokuwapaleka eenhele di li o5 000 kodula. Eshi otashi wedele oiyemo.
“Otashi yambula po eliko eli, otashi toto oilonga ndee katu shi udite ashike nandenande,” Kalili ta ti.
MuMei oThe Namibian okwa li ya lopota kutya eepelesenda di li o10 dovanailonga odi na eengunga deembaanga deebiliona N$45.1 domaumbo.
Pefimbo opo okwa li kwa lopotwa kutya eepelesenda o70 itadi dulu okulanda omaumbo shaashi odi na oiyemo ishona neemhito da ngabekwa dokupewa omikuli domaumbo.
Omunawino moinima ya pamba omaxupilo Almandro Jansen okwa ti ondado yomaumbo oi li unene pombada okuyelakanifa noiyemo yOvanamibia vahapu, unene ngaa molwondilo yokutunga nokulanda edu nomumbwe yomadu a wapalekwa.
“Oitungifo yeumbo leenduda nhatu paife oi li lwopoN$301 000 fiyo opoN$380 000, omanga eendado dedu da ya pombada neepelesenda di li pokati ko20 no38, she likolelela koshitopolwahoololo,” osho a ti ngaho.
The post Ondado yomaumbo i li pombada otai fininikile ovanhu meebashu appeared first on The Namibian.
