Israel oo qaaday tallaabooyin ka dhan ah Britain, xiisadda labada dal oo sii xoogeysatay.

Wasiirka Arrimaha Dibadda Israel, Gideon Sa’ar, ayaa sheegay in Israel ay dhaqan-gelisay tallaabooyin ay hore ugu dhawaaqday oo ka dhan ah Britain, kadib markii dowladda UK ay tallaabooyin iyo cunaqabateyn ka qaadday Israel.

Israel ayaa sheegtay inay ka saartay wakiillada Britain ee ka howlgalayay Xarunta Taageerada Gaza ee Kiryat Gat, joojisay tababarkii ay Britain siin jirtay ciidamada Ammaanka Maamulka Falastiin ee Daanta Galbeed, isla markaana ay Israel ka mamnuucday gelitaanka 12 siyaasi oo British ah iyo muwaadiniin kale oo ay ku eedeysay dhaqdhaqaaqyo ka dhan ah Israel.

Sa’ar ayaa sidoo kale sheegay in Qunsuliyadda Britain ee Jerusalem ay maanta joojisay howlaheedii, iyadoo calaamaddii Qunsuliyadda laga qaaday dhismaha.

Si kastaba, dowladda Britain ayaa sheegtay in goobtaasi aysan si buuxda u xirmin, balse dib loogu magacaabay “UK Mission, Jerusalem”, iyadoo sii wadi doonta hawlaheeda iyo adeegyada ay u fidiso Falastiiniyiinta.

Khilaafka labada dal ayaa sii xoogeysanayay tan iyo markii xukuumadda Labour-ka ay qaaday tallaabooyin ka dhan ah Israel, oo ay ka mid yihiin cunaqabateyn lagu soo rogay shaqsiyaad iyo hay’ado Israeli ah, xayiraado ku saabsan dhoofinta hubka iyo tallaabooyin la xiriira degsiimooyinka Israel ee Daanta Galbeed.

Britain ayaa dhankeeda sheegtay inaysan xilligan qaadi doonin tallaabo aargoosi ah oo ka dhan ah Israel, iyadoo labada dhinac ay weli wadahadallo ka leeyihiin arrimaha diblomaasiyadeed.