Omaudhano goongonyo geli ko ngula

Aadhaningonyo ya yooloka otaya ka kutha ombinga methigathano tali ithanwa “MTC Salute Boxing Academy” ndyoka lyili ko ngula, Olyomakaya.

Sha ikwatelela koshikundaneki shoNBC, aakuthimbinga oyiitaalelathana onguloshi yEtine sha ningilwa mostudio yoNBC.

NBC okwa shanga kutya okuitaalelathana hono okwa ningwa sha landula omaudhano ngoka geli ko Olyomakaya, taga ka ningilwa Windhoek Country Club & Resort.

Yamwe yomaakuthimbinga Jonathan Kasheeta, Abed Shikongo aillemon Nghutenanye sho taya ka taalelathana naadhaningonyo okuza Tanzania, Malawi osho wo Philippines.

NBC okwa nyola kutya uudhano mboka otau ka kala wa kwata miiti, naakuthimbinga aanamibia taya kwashilipaleke kutya itaya dhengelwa megumbo.

Nonando oshigwana ohashi kala sha hala okueta po omaudhano goongonyo onga okumwenyeka, osha keelelwa oshoka opena aapopyokingonyo osho wo aamwenyeki yaana ontseyo.

Onkene okwali kwa indilwa aluhe ngele taku ningwa omaudhano goongonyo ga kale ga pitikwa okuza kehangano lyilile po omaudhano goongonyo.

Omutseyiveta Kadhila Amoomo, sho kwali taku longekidhwa omaudhano pokati kaNinja na Bulelo okwali a shanga kepandja lye lyomalungula kutya, ehangano hali longekindha omaudhano goongonyo nali kale hali sile oshimpwiyu aadhaningonyo.

“Osho shili uudhano woongonyo ohau nyanyudha, ihe natango otu na oku kala tu yali monima. Aadhani inaya kala haya kutha ko uudhano mboka unene etaya geye ndeletaya iheyameke,” a shanga ngaaka.

A tile shoka otashi vulu okuya tulitha muupyakandhi, etaya pewa egeelo.

“Opena eyooloko pokati komudhaningonyo omupopyoki, nomukwashigwana. Oshoka ngoka a popyoka okushi nkene ena okuumba oongonyo opo alulumike, omanga ngwiyaka ota umbu ashike mombepo nelalakano lyoku dhenga,” ali a shanga ngaaka.

Ta ti, otashi kala shili pauyuuki ngele aadhaningonyo aapyokoki ya taalelatahana.

*-vkaapanda@nepc.com.na *

The post Omaudhano goongonyo geli ko ngula appeared first on New Era.