Omulilo mEtosha gwa dhimwa

Victoria Immanuel

Uuministeli womidhingoloko, iihwa nomapashiyono owa dhimi omililo ndatu dho momililo ne dhoka dhali dha temwa kuushelu Etitatu lyazi ko mEtosha, omanga taya ka mbadhala okudhima ngoka ka kwali ga dhima thilu.

Sha ikolela kuuyelele wa pitithwa omasiku gazi ko kuuministeli womidhingoloko, oohekta dha thika poomilliona 1.2 odhali dha hanagulwa po komulilo moshilongo, omanga kwa dhidhilikwa omililo dha thika 1 300 dha holoka okuza omumvo gwayi.

Oshifokundaneki shika osha li wo sha lopota oohekta dhili 854 000 dha hanagulwa mEtosha okuza muSepetemba gwomumvo gwayi. Nonando kwa lopotwa omulilo ngoka gwa ningi esiku tagu fike kEtosha osho wo omikunda dhimwe kOmusati otagu ende tagu dhimi, aaniimuna otaya nyenyeta kutya omililo odha kala nokufaalela iimuna yawo osho wo oohambo nuulithilo wawo.

Omuniimuna gumwe Noah Peingeendunge Elago okwa ti oohambo dhe dhili ndatu osho wo iimuna ye oyali ya pyapo komulilo omumvo gwayi.

“Onduuvite nayi noonkondo itandi vulu okuya muule wa sho paife, oonzi dhandje dhili 17 odha pya po, oohambo dhandje ndatu odha pyapo thiluthilu,” ta popi neyeme.

Iingo Shikale, gwomomudhingoloko Otamanzi okwa ti okwa fikilwa iimuna ye ihetau, ihe yili 10 kayi wetike, keshishi ngele oya pya po nenge oya halakana ashike, ihe sigo onena ineyi mona.

“Omulilo ngoka inagu faalela ashike iimuna, ihe ogwa eta embugaleko. Imuna mbyoka ya hupu po otayi ka sa ondjala oshoka omwiindhi ogwa pipo,” ta ti ngaaka.

Heimo Japhet okwa ti okwa kanithila mo oongombe dhe, ta ti ita vulu okugandja omwaalu, ashike odhindji.

–vkaapanda@nepc.com.na

The post Omulilo mEtosha gwa dhimwa appeared first on New Era.