Okamatyona vati ka dipaa omukulupe otaka kala mokakuma

Okamatyona keedula 15 oko taka tamanekwa kutya vati oka dipaa omukulupe weedula 60 oka anyenwa omhito yokulifutila mo modolongo.

Oka holoka momhangu yamengestrata wOutapi Etitatu.

Oshibofa osha undulilwa komafiku 29 omwedi ou, nelalakano lokuninga omakonakono omoule.

Omutamanekwa ou otaku hokololwa vati e li mondodo onhihamano. Omukulunhu wopolifi moshitukulwa shaMusati, Commissioner Ismael Basson okwa koleka oshiningwanima eshi.

Oshiningwanima osha ningwa oshivike sha dja ko komukunda Onheleiwa moshikandjohoololo sha Etayi efimbo lokonguloshi.

Nakufya okwa tongolwa oye Fried Hamufungu omukalimo womomukunda Onheleiwa.

Otaku hokololwa kutya okamatyona aka oke li omushiinda womukulupe ou.

Opolifi oya hokolola tai ti okamatyona aka oka ya meumbo lomukulupe nelalakano lokuvaka.

Vati oka ya monduda yokunangala yomukulupe ndele ta ke mu denge noshilwifo shihe shiivike. Opolifi oya hokolola tai ti nakuninga oshihakanwa okwe li denga po fiyo ta xulifa.

Otaku hokolola kutya okamatyona aka oka kufa mo omaliko ngaashi ongodi yomuku lupe nokaka lata komongodi.

Oshiningwanima shikwao, omulumenhu weedula 46 ota holoka nena momhangu yaKahao eshi vati a dipaa muwainamati nombele.

Oshiningwanima osha ningwa Etitatu efimbo lokomatango, komukunda Oshilulu.

Nakufya oku na omido 44, noha di meumbo limwe nomufekelwa.

Opolifi oya hokolola tai ti omulumenhu ou okwa li tava tanguna na nakufya osho sha eta opo e mu longele oushada wedipao.

Mexuliloshivike, okwa lopotwa natango ovalumenhu vavali va kwatwa po eshi vati va dipaa mumwainamati kodoolopa koTsumeb.

Oshiningwanima osha ningwa Omaandaxa molukanda Kuvukiland modoolopa yaTsumeb efimbo loufiku.

Nakufya okwa tongololwa oye David Uiseb omukalimo womolukanda Kuvukiland.

*-fhamalwa@nepc.com.na *

The post Okamatyona vati ka dipaa omukulupe otaka kala mokakuma appeared first on New Era.