Ugaaska Xawaadle: Hiiraan waxaa duulaan ku soo ah reer magac dowlaleed sheegta

Ugaaska beesha Xawaadle, Ugaas Yuusuf Ugaas Xasan oo shir jaraa’iid ku qabtay magaalada Beledweyne ayaa sheegay in reer wata shaati dowladeed ay duulaan ku soo yihiin shacabka reer gobolka Hiiraan.

Ugaaska Yuusuf wuxuu ugu baaqay shacabka reer Hiiraan in ay difaacdaan sharafkooda iyo jiritaankooda, islamarkaana ay si degdeg ah isugu yimaadaan magaalada Beledweyne.

Ugaaska wuxuu ugu baaqay askarka ka tirsan Beesha Xawaadle ee ku jira ciidanka xoogga dalka in ay soo garab istaagaan shacabkooda, isago oo xusay in dowladda hadda jirta uu waqtigeedii dhammaaday.

Hadalka Ugaaska ayaa yimid, xilli magaalada Beledweyne laga dareemayo xaalad kacsanaan ah iyo xiisad u dhaxaysa dadka reer Hiiraan iyo dowladda federaalka.

Saacadihii la soo dhaafay waxaa magaalada Beledweyne yimid Cabdullaahi Maxamed Cali Sanbaloolshe oo ka yimid Itoobiya iyo hoggaamiyo ku xigeenka Hirshabeelle Cabdifataax Afrax oo isna ka yimid Muqdisho.

Doorashooyinkii ay dowladda federaalka ka qabatay maamullada Koonfur Galbeed iyo Hirshabeelle ayaa horseeday qalalaase amni iyo kala qaybsanaan deegaannadaas ka jira.

**PUNTLAND POST **