Eenhana tadi lalakanene okukala dingi moukoshoki

EENHANA- Odoolopa yEenhana oshivike sha dja ko oya tameka noshikonga shokuwapeleka odoolopa nelalakano lokukwashipaleka kutya odoolopa oyo imwe i li dingi ya koshoka monooli.

Oshikonga oshi li koshi yoshipalanyole “Wapaleka nena, to kaleke po oushoki mongula.”

Efiku olo tuu olo, natango ovanhu okwa li tava twike oimeno nelalakano lokukaleka po efimano lomiti momidingonoko.

Ovakwashiwana osho yo Ngoloneya woshitukulwa shaHangwena Kadiva Hamutumwa okwa li va holoka momwaalu muhapu okuwapaleka odoolopa.

Okwa li tava ende nodoolopa aishe nokukwashipaleka kutya keshe okambodi ke li pedu okatoolwa po.

Odoolopa yEenhana oyo imwe tai endelele mokukula monooli molwaashi paife otai andjeneke omayakulo a yooloka koshiwana.

Ngoloneya Hamutumwa okwa ti oshikonga eshi osha fimana shaashi otashi xwaxwameke oukoshoki modoolopa.

Hamutumwa ta ti oshikonga shokuwapaleka osha nhuninwa unene peenhele domangeshefelo shaashi opakaka.

“Osha fimana ngeenge ovanhu tava landifile oikulya peenhele da koshoka nawa,” ta ti.

Okwa yelifa ta ti itashi ulike efano liwa ngeenge omunhu ta landifile oikulya ponhele ya kaka.

“Oikulya ngaashi okapana nosho tuu imwe po ya yooloka ngeenge tai landifilwa ponhele ya kaka otashi eta omunhu a kwatwe komiki da yooloka odo hadi etwa kekako,” ta ti.

Okwa kumaida oshiwana opo shi kwapeleke kutya otashi kaleke po odoolopa ya yela efimbo keshe.

“Ka pe na omunhu a pumbwa okulombwelwa kutya na wapaleke onhele yaye shaashi keshe omunhu oku na eendunge dokumona kutya onhele yaye oya kaka ndele ta wapaleke po,” ta ti.

Okwa lombwela oshiwana opo shi xulife po okukupula oimbodi momapandaanda molwaashi otashi ulike oshihopaenenwa shii.

Okwa pandula ovanhu ovo kwa li va waimina elelo lodoolopa okuwapaleka shaashi eshi otashi ulike oukumwe.

“Oukoshoki otau nane ovanangeshefa nomahangano a yooloka modoolopa yetu,” ta ti.

Ombaanga yoFNB oya yambidida elelo lodoolopa yEenhana eshi la yandja eenailona dokutula oimbodi pefimbo ovanhu kwa li tava wapaleke.

*[email protected] *

The post Eenhana tadi lalakanene okukala dingi moukoshoki appeared first on New Era.