Ekonakono inali yakwa ihe omapulo oga gandjwa, Uuministeli welongo tawu ti

Uuministeli wElongo, Aagundjuka, Omaudhano, Oohedhi nOmithigululwakalo owa ti kutya konima sho wa ningi omapulaapulokonakono owa mono kutya ombapila yomapulo gekonakono lyoshilongwa shOndjokonona inayi yakwa.

Ndhika odha popiwa molwa omapopyo ga li taga ti kutya aalongwa yamwe koosikola dhokErongo oya li ya shanga ekonakono omanga ya li ya pewa nale nenge ye shi omayamukulo komapulo gekonakono lyoshilongwa shOndjokonona ondondo ontimulongo nayimwe.

Uuministeli owa ti kutya omapulo gamwe gomombapila ndjoka yekonakono lya shangwa momasiku 28 gaKotoba oga li wo ga pulwa mombapila ya nyolelwe mokakonakono gaAguste.

Ihe Uuministeli owa ti shika itashi pelwa omuntu ombedhi.

“Sho tweshi konakona otwa mono kutya omapulo gamwe gomokakonakono kaAguste oga li ishewe ga longithwa komulongekidhi gwombapila yomapulo gekonakono lyopashigwana, ano a li a za mo momulandu ngoka hagu longithwa,” omukuluntuwiliki gwoshikondo shelongo tate Mbumba Haitengela ta ti.

“Ihe otwa mono kutya oshiningwanima shika inashi guma nayi ekonakono alihe lyombapila ya nyolwa yoshilongwa shika. Ano itaku ningwa nando enyolululo lyekonakono ndika.”

Haitengela okwa gwedha ko ta ti nonando oshigwana osha ngwangwanekwa koshiningwanima shino, itashi pumbiwa nando opo aalongwa ya shangulule ekonakono ndika.

Methano: Minista gwelongo meme Sanet Steenkamp.