Soomaaliya oo la wareegtay shir-guddoonka Golaha Wasiirrada Warfaafinta Carabta.

Wasiirka Warfaafinta, Dhaqanka iyo Dalxiiska Xukuumadda Federaalka Soomaaliya, Cabdifataax Qaasim Maxamuud, ayaa la wareegay shir-guddoonka Kalfadhiga 56-aad ee Golaha Wasiirrada Warfaafinta Carabta, kaas oo ka qabsoomay magaalada Qaahira ee dalka Masar.

Khudbad uu ka jeediyey kulanka ayuu ku gudbiyey salaanta Madaxweynaha Soomaaliya, Xasan Sheekh Maxamuud, isaga oo caddeeyey sida dowladda Soomaaliya uga go’an tahay xoojinta iskaashiga dalalka Carabta iyo horumarinta wada-shaqaynta dhinaca warbaahinta.

Wasiirka ayaa sheegay in warbaahintu door muhiim ah ku leedahay dhismaha dowladnimada, ilaalinta madaxbannaanida iyo midnimada qaranka, dib-u-heshiisiinta iyo ka hortagga fikirka xagjirka ah.

Waxa uu sidoo kale ku baaqay in dalalka Carabtu iska kaashadaan la-dagaallanka dacaayadaha argagixisada iyo wararka marin-habaabinta ah, tababarka suxufiyiinta, hubinta xogta iyo badbaadada shaqaalaha warbaahinta.

Dhanka kale, Cabdifataax Qaasim ayaa adkeeyey muhiimadda horumarinta warbaahinta dijitaalka ah iyo adeegsiga garaadka macmalka ah, isaga oo xusay baahida loo qabo ilaalinta kalsoonida xogta, asturnaanta iyo xuquuqda hal-abuurayaasha.

Isaga oo ka hadlayey qadiyadda Falastiin, ayuu xaqiijiyey taageerada Soomaaliya ee xuquuqda shacabka Falastiin, gaar ahaan xaqa aayo-ka-tashiga iyo dhismaha dowlad madax-bannaan.

Soomaaliya ayaa muddada ay hayso shir-guddoonka golaha la shaqayn doonta dalalka xubnaha ka ah iyo xoghaynta guud, si loo dabagalo go’aannada golaha loona xaqiijiyo in iskaashiga warbaahinta Carabtu ka dhasho natiijooyin la taaban karo.