Ta landifa oikulya noihongomwa yoshiwambo

Hambeleleni Daniel

Omunangeshefa Hileni Namupala a shivika nawa nedina ‘Shinga wa Elia’ oku udite etumba oku kala a kufa ombinga momauliko oipindi aNgwediva neudo.

Namupala oo eli mwene wongeshefa yedina Waakambadhala kusindi momatala aNdangwa okwa hokolola kutya yeemwene omunangeshefa moinima lyoshiwambo ngaashi eenhanga dolumbamba,omingome,omanghili,omando,omaholo okukandela nomafungu naikwao ihapu.

Namupala okwa ti elalakano laye loku kala momaulikilo oipindi aNgwediva kali fi ashike lokulandifa ndele okulonga ovanhu omufyuululwakalo woshiwambo noku vatwa omukumo opo va kale va fimaneka oilikolomwa yOshiwambo noku i kaleka po.

Yee mwene okwa itavela nokutya oilikolomwa yoshiwambo oili lela ya fimana momufyuululwakalo noya pumbwa okulongwa oshiwana shokomongula.

Okwa weda po kutya oilikolomwa imwe oili tai ende tai kanifa ongushu omolwa exumokomesho olo tali endelele.

Okwati oivilo ngaashi e i yomauliko oipindi oha i pe ovanangeshefa vopedu omhito opo va ulike oilandifomwa yavo nokulishiiva novanangeshefa vakwao.

Natango vali ohashi yandje omhito kuvo opo veli tulile mo omadilaadilo noku li longelamosha muvakwao.

“Ovanyasha nava longife ounongo wavo mokutameka eengeshefa ndele inava kala ashike va tala kepangelo.

Oilonga e i nayo oya fa ashike oilonga yepangelo ngeenge owei uduko ndele to li tula mo,” Namupala ta ti.

Natango vali okwa ifana ovakwashiwa vomomundingonoko opo va kale hava lande oinima yavo yoshiwana osho oyo ovaleli ngeenge va holoka moivilo ngaashi e i yo mauliko oipindi va kale ngaho have va sapota nande onokatina ngaho.

“Ovanhu nava kale tava kwafa eengeshefa domomudingonoko opo ashike va kwatele po oilonga yetu nokukaleka po omufyuululwakalo wetu,” Namupala ta ti.

Namupala okwa weda po kutya nonande eli omunangeshefa wopedu, okwa taalela yo omashongo ngaashi: okulya eedjo, omunhu teya ngaho pongeshefa yaye ndelo tali eedjo ndelo konima yefimbo ine di futa vali.

Okukala wa teka oinima ihapu ndele tai kala ina i pwapo ile oinima i ninge nai.

Natango okwa hololo kutya eliko loshilongo ola wa pendu nheenghono, novalandi osho ngaho va ninga vashona.

Okwa ti ovanhu navadje momutumba, va kondjife oluhepo voo va dule okukala veli fikamena po kuvo vene.

-hambelelenindaniel56@gmail.com

The post Ta landifa oikulya noihongomwa yoshiwambo appeared first on New Era.