Ciidamada Itoobiya oo la wareegay magaalo ku taalla xuduudka Eritrea.

Wararka laga helayo gobolka Tigray ayaa sheegaya in ciidamada Itoobiya ay la wareegeen gacan ku haynta magaalada istaraatiijiga ah ee Adigrat, oo ku taalla waqooyiga Itoobiya, una dhow xuduudda Eritrea.

Wakaaladda Wararka Faransiiska ee AFP ayaa sheegtay in ciidamada Itoobiya ay gudaha u galeen magaalada, taas oo qiyaastii 30 kiiloomitir u jirta xuduudda Eritrea.

Gelitaanka ciidamada Itoobiya ayaa ku soo beegmaya maalmo kaddib markii ciidamada Eritrea ay dib uga gurteen deegaanno ay hore uga joogeen gobolka Tigray, iyadoo xaaladda gobolka ay weli tahay mid xasaasi ah.

Adigrat ayaa loo arkaa magaalo muhiim ah oo dhanka istiraatiijiyadda ah, maadaama ay ku dhowdahay xuduudda Eritrea isla markaana ay ku taallo marinno muhiim u ah isu socodka iyo dhaq-dhaqaaqa ciidamada.

Wararka ku saabsan gacan-ku-haynta magaalada ayaa imanaya xilli xiisadaha u dhexeeya dhinacyada ku lugta leh xaaladda Tigray ay sare u kacayaan, iyadoo indhaha lagu hayo isbeddellada cusub ee militari ee ka socda gobolka.