Ovanambelewa vopombela kave shi eembudi – Nghipangelwa…ina mu pata vali omaumbo eni

ONGWEDIVA- Omukulunhuwiliki wouhaku moshitukulwa shaShikoto Josua Nghipangelwa okwa kumaida oshiwana opo shi longele kumwe novanambelewa pefimbo tava pombele omaumbo.

Okwa ti ovanambelewa vopombela ove li pambelewa, nove na omikanda odo tadi ulike kutya ova pewa oshinakuwanifa shokupombela momaumbo.

Okwa yelifa ta ti paife ovanambelewa vopombela otava longo noudjuwu shaashi ovanhu ove hole okupata omaumbo avo.

Edi Nghipangelwa okwe di popya onghela pefimbo a ninga eenghundafana naKundana omo a hokolwa ta ti ombelewa yaye tuma omwaalu muhapu wovanhu tava ka longa mopombela ashike ova taalela eshongo lomaumbo taa patwa.

Okwa didilikwa oitukulwa ya yooloka oye li pyakidila nokuyandja omadeulo kovanhu tava ka longela mopombela nelalakano lokulela omukifi womalaria.

Neudo ouministeli wouhaku nonghalo nawa okwa li wa pitifa olopota kombinga yomivalu dovanhu vahapu va kwatwa komalaria osho yo ovanhu va xulifa.

Omudo keshe ouministeli wouhaku ohau ningi oshikongo shokupombela momaumbo opo ku keelelwe etandavelo lomukifi wamalaria. Nghipangelwa okwa ti malaria oha tandavele unene pefimbo lodula osho yo ngeenge omunhu a lika keemwe.

Okwa ti ouministeli otau twikile okuyandjaneka eenete demwee kovanhu shaashi eeneta ohadi kwafele okukelela ovanhu vaha like keemwe.

Omukulunhuwiliki okwa ti osha fimana ngeenge oovene vomaumbo tava yandje epitikilo kovanambelewa tava longele mopombela opo va dule okutwimikila momaumbo avo.

“Omiti odo tadi twimikilwa meenduda oda fimana shaashi ota di kwafele okukelela malaria. Otashi kwafele okushunifa etandavelo lamalaria pedu,” ta ti.

Okwa ti malaria okwa nyika oshiponga shaasshi oha dulu okudipaa ovanhu, onghee osha fimana opo ovanhu ve li ufe komilandu da tulwa po.

Nghipangelwa okwa lombwela ovanhu opo kwashipaleke kutya otava kufa mo omaliko avo meenduda opo aha twimikilwe omiti.

“Oikulya na i kufwe mo meenduda shaashi osha nyika oshiponga ngeenge tai twimikilwa omiti,” ta ti.

Okwa ti ope na ovanhu vamwe ohava nyenyeta kutya ovanambelewa vopombela ohava vavake mo omai nosho tuu oimina imwe po ngeenge tava i meenduda.

“Omunhu keshe okwa manguluka okulandula ovanambelewa vopombelela ndele ta kala e vakalela pefimbo tava pombole,” ta ti.

Okwa yelifa ta ti eshi osha fimana shaashi otashi kwafele omunhu a kwashipeleke kutya omaliko aye ina vakwa po.

“Natu longeleni kumwe okukelela omukifi womalaria momidingonoko detu,” ta ti.

[email protected]

The post Ovanambelewa vopombela kave shi eembudi – Nghipangelwa…ina mu pata vali omaumbo eni appeared first on New Era.