Wasiir Fiqi: “Ilhan Omar waxaa loo beegsanayo Waa asalkeeda Soomaalinimo”

Dowladda Federaalka Soomaaliya ayaa walaac ka muujisay waxa ay ku tilmaantay bartilmaameedsiga siyaasadeed ee lagu hayo xildhibaan Ilhan Omar oo ka tirsan Aqalka Wakiillada Mareykanka, iyadoo sheegtay in weerarrada iyo cadaadiska ay la kulmeyso ay xiriir la leeyihiin asalkeeda Soomaalinimo iyo diinteeda Islaamka.

Wasiirka Gaashaandhigga Soomaaliya, Axmed Macallin Fiqi, ayaa sheegay in dowladda Soomaaliya ay ka xun tahay xaaladda ay ku sugan tahay Ilhan Omar, oo ka mid ah siyaasiyiinta asal ahaan Soomaalida ah ee ka dhex muuqda siyaasadda Mareykanka.

Fiqi ayaa tilmaamay in Ilhan Omar ay wajahdo cadaadis iyo indho-indheyn siyaasadeed oo xooggan, isaga oo arrintaas ku xiriiriyay Soomaalinimadeeda iyo diinteeda Islaamka. Hadalka wasiirka ayaa muujinaya walaaca dowladda Soomaaliya ka qabto sida loola dhaqmo siyaasiyiinta asal ahaan ka soo jeeda Soomaaliya ee ku nool dalalka reer Galbeedka.

Wasiirku waxa uu sidoo kale ka hadlay xiriirka ka dhexeeya Soomaalida ku kala nool Geeska Afrika, isaga oo sheegay in Soomaalida ku nool Soomaaliya, Itoobiya, Kenya iyo Jabuuti ay yihiin bulsho isku asal iyo isir ah, inkasta oo ay ku kala nool yihiin dalal iyo xuduudo siyaasadeed oo kala duwan.

Hadalka Wasiir Fiqi ayaa imanaya xilli Ilhan Omar ay sheegtay inay la kulmeyso hanjabaado dil oo soo noqnoqday, kuwaas oo ay sheegtay inay khatar ku yihiin amniga qoyskeeda.

Xildhibaanadda oo laga soo doorto gobolka Minnesota ayaa wareysi ay dhawaan bixisay ku sheegtay inaysan sii joogi karin gurigeeda ku yaalla agagaarka Washington, DC, maadaama cinwaanka guriga uu noqday mid si guud loo heli karo, isla markaana ay jiraan walaac la xiriira badbaadada carruurteeda iyo qoyskeeda.Arrintan ayaa sii xoogeysatay kaddib markii 12-kii Oktoobar 2026 ay saraakiil ka tirsan hay’adda baarista amniga gudaha Mareykanka (HSI) baaritaan ku sameeyeen gurigeeda, iyaga oo fulinayay amar maxkamadeed oo la xiriira baaritaan dembiyeed oo socda.

Wasaaradda Caddaaladda Mareykanka ayaa xaqiijisay in baaritaanka lagu fuliyay amar maxkamadeed, balse faahfaahin buuxda kama aysan bixin dhammaan arrimaha baaritaanka. Warbaahinta Mareykanka ayaa sheegtay in baaritaanku la xiriiray dukumentiyo socdaal iyo socdaal-gelin oo hore, eedeymaha la xiriirana ay Ilhan Omar iyo kooxdeeda sharciyeed beeniyeen.

Ilhan Omar ayaa Madaxweyne Donald Trump ku eedeysay inuu adeegsanayo awoodda dowladda federaalka si uu u cadaadiyo dadka siyaasiyan ka soo horjeeda. Trump ayaa dhankiisa sheegay inuusan wax lug ah ku lahayn baaritaanka gurigeeda, isaga oo arrinta u daayay hay’adaha caddaaladda.

Inkasta oo Ilhan Omar ay baaritaanka ku tilmaantay cabsi-gelin siyaasadeed, haddana ilaa hadda ma jiro caddeyn rasmi ah oo la soo bandhigay oo xaqiijinaysa in tallaabada lagu qaaday gurigeeda ay si gaar ah ugu saleysneyd Soomaalinimadeeda ama diinteeda. Dowladda Soomaaliya ayaa dhankeeda muujisay walaac ku saabsan waxa ay u aragto bartilmaameedsiga xildhibaanadda.