Oumatyona vomOshana monomola yotete mokatanga kokeemadi

OSHAKATI- Oumatyona ve li koshi yeedula 13 va dja moshitukulwa shaShana ova eta ekopi neembadi 15 eshi va finandana koudano wa li mexuliloshivike kOkahandja.

Ova findana ponomola yotete konima eshi va denga mo oshitukulwa shaKhomas 2:0 keepelendi.

Ohava danene oshipana yedina School Sport Union National (NSSU).

Omakondjifafano oudano ou okwa li ashike woumatyona ve li koshi yeedula 13 ovo va dja koitukulwa ya yooloka.

Pefimbo a ninga eenghundafana naKundana onghela Moses Moo Wilhem ou e li omukwateli komesho woshipana ei, okwa ti oumatyona ova ninga omadeulo oule woshivike tave li longedile okuya koudano.

“Oumatyona ova kala tava ningi omadeulo nelitulemo nelalakano lokukafindana. Otava dana nawa moshili fiyo va findana,” ta ti.

Okwa hokolola ta ti oshipana yavo oina oumatyona ve li 13 va dja keefikola da yooloka di li moshitukulwa shaShana.

Wilhem okwa yelifa ta ti tete oumatyona ova dana noshitukulwa shaKaras nokulifiya ofika 1:1.

Omanga Oshitukulwa shaShikoto 2:1 taku landula oshitukulwa sha Erongo 1:1 nokonima ova kafindana keepelendi 2:0.

“Omadeulo oo twa kala hatu yandje koumatyona vetu okwa li e na ongushu, naashi osha eta opo tu kale twa findana,” ta ti.

Okwa ti osha fimana ngeenge ovadanitanga tava ningi omadeulo nelitulemo shaashi otashi yandje efano kutya ove li longekida okukaya komafiyafano.

“Oudano owa fimana kovanafikola shaashi otau vape omhito yokulongifa ounongo wavo tashi pitile mokatanga kokeemadi,” ta ti.

Okwe weda po ta ti oudano natango ohau xwaxwameke oukumwe ngeenge ovanafikola tava hangana pamwe navakwao.

“Komesho yeedula otwa teelela moshipana yetu opo mu kale mwa dja ovanhu tava ka ninga ovadanitanga dingi moshilongo osho yo okukalela po Namibia kondje yoshilongo,” ta ti.

Wilhem okwa ti ova taalela omashongo oyeendifo ngeenge tava twala ounona komadeulo shaashi ohava kala keefikola da yooloka.

Okwa weda po ta ti ova taalela omashongo ngaashi omidjalo domaudano osho yo eenghaku.

Etitatu oumatyona ova twala ekopi kombelewa yangoloneya waShana, Hofni Iipinge nelalakano loku mu likila eshi va longa shomupondo.

Ngoloneya okwa pandula oumatyona ta ti ova ninga nawa eshi va eta ekopi keumbo.

“Ina ndi e telwa mo nale ekopi moshitukulwa shange la dja kovadanitanga. Onye motete okuetela nge ekopi. Omwa longa nawa vamati vange,” ta ti.

Iipinge okwa ti ota ka landela oumatyona omidjalo domaudano osho yo eenghaku.

Efiku tuu olo, natango okwa yandja oikombo ivali koumatyona ava opo va kalye ombelela nelalakano lokutyapula efidano lavo.

Okwa kumaida ovanafikola ava opo ve li honge nondjungu molwaashi ofikola oya fimana.

[email protected]

The post Oumatyona vomOshana monomola yotete mokatanga kokeemadi appeared first on New Era.