Oikandjohoololo mOshana ya mona oitaashi yopolifi

OSHAKATI- Ngoloneya waShana Hofni Iipinge onghela okwa yandja pambelewa kopolifi oucaravans ve li 13 tava ka tulwa koikandjohoololo i li moshitukulwa oyo ihe na oitaashi yopolifi.

Iipinge okwa ti otava ka longifwa okuninga oitaashi yopolifi koikandjohoololo nelalakano lokueta omayakulo opolifi popepi noshiwana.

Oucaravans omaumbo a longwa aa dulu okutumbwapo ndele taa tulwa ponhele imwepo, okwa longwa e na omutungilo ngeno wa fa wobesa.

Okwa tungwa e li moshipangelo shaShakati aa kala po efimbo lile ashike itaa longifwa vali.

Ngoloneya okwa ti tete okwa kwatafana nombelewa yomukulunhu woshipangelo shaShakati kutya okwa hala oucaravans ovo itava longifwa opo va yandjwe kopolifi.

“Okudja opo omukulunhu woshipangelo okwa dimina, konima eshi nde mu fatululila kutya oucaravans otava ka longifwa shike,” ta ti.

Iipinge okwa ti yelifa ta ti itashi ulike efano liwa ngeenge moshitukulwa shaye muna omatungo epangelo ndele ita longifwa omanga pena ovanhu tava mono oixuna va pumbwa okulongifa omatungo oo.

Okwa weda po ta ti ombelewa yaye oya didilika moshitukulwa muna omatungo epangelo ndele itaa longifwa omo natango e na ediladilo lokukala a yandja po koikondo yepangelo oyo ya pumbwa okuyandjaneka omayakulo.

Iipinge okwa ti opena ovanhu ve li komikunda tava mono oixuna okuenda endjila diledile tava ka konga omayakulo opolifi.

“Nena ngeenge momukunda wonhumba omwa tulwa oucaravans, otashi kwafele okukelela ovanhu vaha ende vali oshinano shile va uka komikunda donhumba tava ka konga omayakulo opolifi,” ta ti.

Iipinge okwa yelifa ta ti oitaashi yopolifi oya fimana ngeenge i li popepi noshiwana shaashi otai kwafela okulwifa oimbuluma unene tuu omahepeko omomaumbo.

“Ngeenge oitaashi yopolifi oi li popepi noshiwana nena otashi kwafele opo ovanhu va kale tava lopota oimbuluma pefimbo,” ta ti.

Ngoloneya okwa ti natango ngeenge oitaashi yopolifi oya tulwa koikandjohoololo keshe otai kwafele ovanyasha ngeenge tava ningi omaindilo oilonga okukala tava dengifa eembila davo oihako.

Okwa pandula ouministeli wouhauku eshi wa dimina ndele tau pitike ombelewa yaye ikale ya yandja oucaravans ava.

Okwa ti elalakano lokuyakula oshiwana moshilongo osho yo okueta omayakulo popepi noshiwana onga ovaleli tava longo nondjungu.

Omupedu komufala wopolifi moshitukulwa shaShana, Steenkamp Nico okwa pandula ngoloneya waShana osho yo ombelewa yomukulunhu woshipangelo shaShakati eshi tai twikile okulongela kumwe nelalakano lokuyandjaneka omayakulo koshiwana.

Okwa popya ta ti oucaravans ava otava ka etela oshiwana ouwana molwaashi otashi ka longifa omhito ei okulopota oimbuluma pefimbo nokukonga omayakulo opolifi.

*[email protected] *

The post Oikandjohoololo mOshana ya mona oitaashi yopolifi appeared first on New Era.