Shipindo ta twikile okuyambidida ovanafikola

OKONGO- Kansela woshikandjohoololo shaKongo Efraim Shipindo okwa tota po oshikonga shokuyambidida ovanafikola voukadona okuvapa oukote molwaashi ove li momhumbwe.

Oukote oututa hau longifwa kovakainhu ngeenge ve li komafimbo opaushitwe.

Shipindo okwa ti ombelewa yaye oya didilika ovanafikola va taalela omashongo oukote osho shi li hashi eta opo ovanafikola va faule keetundi.

“Unene tuu ovanafikola ve li komikunda otava dengwa koluhepo shaashi kave na oimaliwa yokulanda oukote. Ovadali vavo kavehe na oyuuyemo yokulandela ounona vavo oukote,” ta ti.’

Okwa yelifa ta ti naashi osha eta opo ombelewa yaye i kale ya tota po oshikonga shokukonga oukote nelalakano lokuyandja keefikola.

Shipindo ou natango e li omunashipundi welelo loshitukulwa shaHangwena okwa hokolola ta ti oshikonga eshi osha fimana molwaashi otashi lalakanene okukaleka ovanafikola oukadona mofikola.

“Itshi ulike efano liwa ngeenge omunafikola ta faula keetundi shaashi ehe na oukote vokumukwafela ngeenge e li komafimbo oushitwe,” ta ti.

Okwa ti nena ngeenge omunafikola okwa faula keetundi ota shaala po koinyangadalwa yaye ndele ta hange vakwao ve li nale komesho.

Shipindo okwa ti oukadona vahapu ve li moshitukulwa shaHangwena ova mona ouwa okupitila moshikonga eshi konima eshi va pewa oukote. Okwa hokolola ta ti natango, itashi ulike efano liwa ngeenge okakadona ke li mongulufikola ke na ofulukweya ya tilyana ohonde.

Kansela okwa ti eshongo likwao, ovanafikola vamwe ove li kokule nodoolopa osho hashi kala shidjuu ngeenge va hala okuya keefitola vaka lande oukote.

“Ovanafikola ovo oveleli vokomongula, osha fimana ngeenge hatu yambidida ovanafikola molwaashi otashi vatu omukumo wokuli honga nondjungu,” ta ti.

Kansela okwa pula omahangano a yooloka ile omunhu keshe ou e na ehalo lokuyambidida ovanafikola noukote opo a kale a kwatafana nombelewa yaye.

Okwa yelifa ta ti ngeenge okwa pewa oukote nena otava ka yandjenekwa keefikola.

“Oukote itava yandjwa ashike keefikola odo di li moshikandjohoololo shange ndele otava ka yandja keefikola da yooloka mOhangwena,” ta ti.

Okwa ti natango okuna oprograma yokuyambidida ovanafikola noikwafifohongo osho yo omidjalofikola.

[email protected]

The post Shipindo ta twikile okuyambidida ovanafikola appeared first on New Era.