Ciidamada Dowladda iyo Macawiisleyda oo howlgallo ka wada bariga Hiiraan.

Ciidamada Dowladda Federaalka Soomaaliya iyo kuwa deegaanka ee Macawiisleyda ayaa howlgallo ka dhan ah kooxda Al-Shabaab ka wada deegaanno ka tirsan bariga gobolka Hiiraan.

Howlgalladan ayaa lagu doonayaa in lagu wiiqo dhaq-dhaqaaqyada Al-Shabaab, lagana hortago weerarrada ay kooxdu ka fuliso deegaannadaasi, iyadoo ciidamada iskaashanaya ay xoogga saarayaan xoojinta difaaca iyo sugidda amniga.

Dhanka kale, Dowladda Federaalka Soomaaliya ayaa qorsheynaysa inay ciidamo dheeraad ah u dirto deegaanno ka tirsan maamulka HirShabelle, si loo kordhiyo awoodda ciidamada ku sugan furimaha dagaalka, loogana hortago weerarrada lagu beegsanayo saldhigyada milatariga.

Tallaabooyinkan ayaa qeyb ka ah dadaallada lagu xoojinayo amniga deegaannada ay ciidamada dowladdu ka howlgalaan, xilli ay weli socdaan howlgallada iyo iska horimaadyada lala xiriirinayo Al-Shabaab ee qaybo ka mid ah gobolka Hiiraan.

Ilaa hadda, lama shaacin tirada ciidamada dheeraadka ah ee la qorsheynayo in la diro iyo deegaannada sida gaarka ah loo geyn doono.