Taya longekidha esiku lyiipindi

Osikola yosekundosikola Okatana moshitopolwa shaShana otayi hiya oshigwana opo shi kayambidhidhe aalongwa sho taya ka ninga esiku lyiipindi noshilongwa shuunangeshefa.

Sha ikolelela komushangwa gwa pitithwa komukuluntusikola Markus Hango, esiku lyipindi olyi li oshitopolwa shomusindahongo goshilongwa shuunangeshefa ta li longekidhwa kaalongwa yondondo ontimugoyi ashike.

“Aanasikola taya ilongo oshilongwa shika oya tegelelwa ya ulike uunongo mboka yiilongo momukokomoko gwoomvula dhoka mbali ondondo ontihetatu sigo ontimugoyi.

Ta ti, omunasikola keshe otaka landitha ilandithomwa ye mwene, naashoka taka likola mo, otashi kaya melimba lye mwene.

Onkene oshigwana osha indilwa nesimaneko enene opo shi yambidhidhe aalongwa mwaashoka taya pula.

“Oto vulu oku shi ninga pashimaliwa nenge wu lande oshilandithomwa.
Konima yomangeshefo, omulongwa keshe okwa tegelelwa a shange olopota nkene
ongeshefa ye ya longa, onkene eyambidhidho lyoye moshinima shika ota li ka simanekwa,” ta fatulula ngaaka.

Hango okwa indile wo ookuume yaavali yena aanona yeli posikola mpoka opo ya thike esiku ndyoka ya yambidhidhe aalongwa osho wo okuulika uukwawo wanankali.

Omukuluntusikola okwa ti oshigwana nashi dhidhilike kutya, miinima yoludhi ndoka oha mu vulu wo okuendela uulingilingi, onkene ngoka ena epulo nenge omalimbililo mwaashoka naya dhengele mombelewa yosikola.

“Oshindingili shika otashi ningilwa posikola mesiku ndjoka ta li ka kala ko 25 Septemba 2026, ethimbo 8:00- 17:00,” ta ti ngaaka

Yamwe yomaalongwa mboka taya longekidha esiku ndyoka lyokulanditha oya ti oya nyanyukwa oshoka otaya ka ilonga nkene yena okueta po oshimaliwa.

“Nguka omukalo goku longekidhwa nkene gumwe ena okukala omunangeshefa, oshoka otwa longitha omwaalu okueta po iilandithomwa, naashoka twa hala okumona mo ngele twa mana,” ya ti ngaaka.

Gumwe okwa ti ngele oya mono mo oshimaliwa shoka ya yalula, ota kala ta landitha iinima ye ethimbo lyefudho -vkaapanda@nepc.com.na

The post Taya longekidha esiku lyiipindi appeared first on New Era.