Epangelo ota li ka andjaneka olusheno oshilongo ashihe

**Victoria Immanuel **

Ondangwa – Nonando oopelesenta ashike 59,5 dhina olusheno moNamibia, epangelo olya kwashilipaleke okuindjipaleka ooproyeka dholusheno opo oshigwana ashihe shi mone olusheno unene mboka yeli kuushayi.

Okwa dhidhilikwa oopelesenta ashike 37,9 odho dhina olusheno kuushayi omanga oopelesenta 77,3 dhina olusheno mondoolopa, shoka tashi ulike kutya kuushayi okwa pumbwa eyimbidhidho lyolusheno.

Minista gwiikwamina niikwankondo Modestus Amutse okwa li a popi ngaaka oshiwike shika sho kwali a gongaleke omahangano haga andjaneke olusheno moshilongo kOndangwa, okukundathana nkene yena okuandjaneka olusheno moshilongo ashihe.

Amutse okwa ti olusheno olwa simana oshoka ohalu longithwa a ngala kehe pamwe okuhwepopaleka onkalo.

“Olusheno kashi shi ashike oopala dha thikama, ihe ohalu longithwa melongo, uuhaku, egameno, omakwatathano osho wo okueta po oshimaliwa,” ta fatulula ngaaka.

Ta gwedha po kutya olusheno olo ashike talu vulu okulongithwa opo epangelo lyi hwepopaleka onkalo yoshigwana.

Amutse okwa ti, olusheno oha lu yambidhidha okuminikila opo aanasikola ya leshe ngele kwa toko, oha lu kwathele okutalaleka iilandithomwa opo gumwe a hupe, oha lu kwathele peempito odhindji okuyambidhidha oshigwana.

“Otandi indile omahangano haga andjaneke olusheno opo ga kambadhale okukandula po shoka tashi shunitha monima okuandjeneka olusheno osho wo okuya po nooproyeka dhoka,” ta indile ngaaka.

Ngoloneya gwoshitopolwa shaShana Hofni Iipinge okwa indile elongelo kumwe pokati koombelewa dhoshitopolwa nomahangano gokuandjaneka olusheno, uuna yeya po nooprograma dhina sha nooproyeka dholusheno.

Ta ti, shoka otashi ka yambidhidha okutula miilonga shoka sha tegelelwa koshigwana okuza mondoolopa sigo okuushayi.

“Mboka yena oshinakugwanithwa shokuandjeneka olusheni naye shi ninge ngaashi yeshi ineekelelwa, unene Ngele iilongothimwa ayihe yiigwana po,” ta kumagidha ngaaka.

Sofia Amadhila gokOnaanda moshitopolwa shaMusati okwa ti oha pata ondingosho ye ku yele oshoka, ke na sha olusheno. “Ngele kwa took, ita ndi mono ko we. Mpoka pwa za olusheno okokule, katu na iimaliwa ya gwana okuhila olusheno,” ta popi ngaaka.

Ta indile ta ti, olusheno olwa pumbwa okuandjanekwa oshali yo ya kale taya futu omayakulo.

-vkaapanda@nepc.com.na

The post Epangelo ota li ka andjaneka olusheno oshilongo ashihe appeared first on New Era.