Aanegumbo ta ya tembudhwa mOneshila ota ya ka futwa mo

OSHAKATI-Elelo lyondoolopa lyOshakati olya ti ota li ka tameka okufuta aakalimo yomOneshila mboka yena omagumbo taga ka tembudhwa omolwa omatendululo ga nuninwa omalukanda mOneshila.

Omukuluntu melelo lyondoolopa lyOshakati Timoteus Namwandi okwa ti olukanda Oneshila ota li ka tungwa pamuthika gondoolopa, sho ta li ka ukulilithwa.

Ta ti, elalakano okuhulitha po oombashu, onkene mboka yeli ngaashingeyi molukanda Oneshila ihe oye na ehalo no taya vulu, otaya ka pewa omahala koExtention 1, hoka taya ka tungilwa omagumbo okupitila mooproyeka dhokutungila aantu omagumbo.

“Ooproyeka dhoka opo dhili nale dha longekindhwa, dha tegelela ashike omayindilo uuna elelo lyondoolopa lya mana okulongekidha ehala ndyoka Extension 1,” ta ti ngaaka.

Ta fatulula kutya mboka itaya vulu okutungitha omagumbo ita shi thiminikilwa omuntu otaya kala ashike mpoka yeli, ashike omahala otaga tulwa melandulathano.

Namwandi okwa ti Oneshila otayi ukililithwa ashike yi kale melandulathano ngaashi omalukanda omakwawo.

“Ha kehe gumwe taka tembundhwa, oomboka ashike ya gumwa onkene ota tu ka tula omagumbo momalandulathano noku ya etela omayakulo agehe popepi,” ta ti ngaaka.

Ta ti ondoolopa yaShakati momimvo ndhokomeho otayi ka ninga oshilando oshoka shoka ya thanekela Oshakati, uuwanawa owindji.

Omukalimo gwomolukanda Oneshila Cornelia Thobias okwa ti kaye na nando uupyakandhi wokwaatembudhwa, sha ike elelo yondoolopa ta li ya etele omayakulo popepi.

“Otu li momahala ga thinana ngele otwa pewa uuwanawa ngaashi omalukanda ngoka ga tulwa pa mu thika gopandoolopa ota tu kala tuuvite nawa oshoka ota tu kala twa mangulaka nawa tuna oopolota dhetu,” ta ti ngaaka.

Thobias okwa pandula wo elelo lyondoolopa omolwa ehumokomeho ya ipyakindhila nalyo.

-vkaapanda@nepc.com.na

The post Aanegumbo ta ya tembudhwa mOneshila ota ya ka futwa mo appeared first on New Era.