Haimbodi a yandja oipundi 250 kOneheke

Hambeleleni Daniel

Omunangeshefa Josua Haimbodi okwa shakeneka epangelo ondjilakati eshi a yandja oipundi i fike po250 kofikola Oneheke Combined moshitukulwa shaMusati.

Haimbodi okwa holola kutya okwa yandja ekwafo eli sha landula eshi ali a talela po ofikola ei nokumona nghene ili momhumbwe yoipundi.

Eshi kwa li a talela po Oneheke, Haimbodi okwa ti okwa hanga ovanafikola tava longifa, veli ko omutumba oovavali vo otava kondjele oipundi shaashi ina i wana.

Haimbodi pefimbo ta yandje oipundi kofikola, okwa twa ovanafikola omukumo opo va kufe ko eenghaku keemadi, veli honge nelitule mo vo va diinine elihongo lavo.

Ehongo oshinima sha fimana. Ofikola oya fimana shaashi ohai patulula eenghalamwenyo dovanhu. Hano longe ni noudiinini opo mu hange eendjodi deni,” Haimbodi ta tu ovahongwa omukumo ngaho.

Okwa kumaida ovahongwa opo va tule ehongo ponomola yotete. Ta ti ehongo ngeenge owe li tula ponomola yotete, oto dulu oku ka twikila nounangeshefa woye ile keshe osho wa hala okuninga monakudiwa.

Haimbodi okwa ti ounona ava vena ohokwe mounangeshefa nave lihonge oihongwa ngaashi, omwalu, oaccounting noshilongwa shounangeshefa hano entrepreneurship.

Natango okwa lombwela ounona va kale tava fimaneke ovakulunhu,ovahongi vavo novanafikola vakwao opo ashike va kale nelao nomwenyo mule kombanda yedu.

Okwa denga omufindo pomalodu kutya nava efe omalondu noingangamwifi.

Okwa kumaida natango ounona voukadona opo ve li kaleke kokule novamati, va keelele omateelelo inaa longekidwa.

Haimbodi okwa pula ovanangeshefa vakwao novakwashiwana opo va shakeneke epengelo ondjilakati molwaashi epangelo nalo ita li shi wanifa olo alika.

–hambelelenidaniele56@gmail.com

The post Haimbodi a yandja oipundi 250 kOneheke appeared first on New Era.